අසමාන

සුදු නංගි

2012-01-27T08:00:00.000-08:00

අද වැහි දවසක්..කළු වලාකුල්වලින් අහස බරවෙලා.ඉර කොහෙදෝ හැන්ගිලා.. වැස්ස බලන්නැතුව ජැකට් එකත් දාගෙන වෝට ප්‍රූෆ් බොටමකුත් උඩින් ඇන්දගෙන උදෙන්ම කැම්පස් එකට ගියෙ හීතලට ගුලුවෙලා බුදියගන්න බැරුවනම් නෙමේ..මේසෙ උඩින් බෑග් එක තියල..බෙදාගෙන ගිය බත් එක කන්න පටන්ගත්තෙ වෙනදට උදේට කන ඕට්මීල් ඉවර වෙල හින්ද..ෆ්‍රිජ් එකේ අලුත් දේවල් නැතිඋනත් හැමදාම ඒක ඇරල බලනව වගේ ෆේස්බූක් එක දිග ඇරගත්තෙ තට්ටතනියෙන් කනකොට පාළු හින්ද..කටවල් දෙකයි කන්න හම්බුනේ..හලෝ කොහොමද කියල සිනාමුසු මුහුනෙන් ඇවිත් මගෙ ළගින්ම වාඩිවුනේ සුදු නංගි කෙනෙක්..ඊට කලින් කවදාවත් එයාව දැකල නැති උනත් ඒ ඇස් දෙකේ හුරුපුරුදු බවක් තිබුනා..ඒ වගේම කෙනෙක් මං කොළඹ කැම්පස් එකේ ඉන්න කාලෙ දැකල තිබුනා..ඒ අක්කත් ඒවගේම සුදුයි..ඉටි රූපෙ වගේ..ඔව්..එ අක්ක කෙනෙක් නිසා එයා ඕපන් එකට ඇවිත් කාල යනකම් එයා දිහා බලන් හිටිය මිස ඊට වඩා දෙයක් කරන්න බැරිඋනා..මේ සුදු නංගිව දැක්ක ගමන් මගෙ මතකය අවුරුදු 6ක් විතට ආපස්සට ගියා තප්පරෙන්..ඒ කාලෙ ඉගෙන ගත්ත කෝස් වල නමක්වත් මතක නැති උනත් ඒ අක්කගෙ රූපෙ මෙච්චරකල් මගෙ හිතේ රැඳිල තිබීම ගැන මං මගෙ මතකය ගැන ආඩම්බර වෙනව..කතාව පිට පනිනව වගේ හින්ද ඔන්න ආයෙ ට්‍රැක් එකට ගත්ත..

ඒ සුදු නංගිට තිබුනෙ ලස්සන ඇස්..නිකන් මාළුවෙක්ගෙ වගේ..කොන්ඩෙ කලුයි..මූනෙ ආලේපන තවරල නැති චාම් සරල කෙනෙක්..යප්..ශීස් මයි ටයිප්..කම්බි වැටකින් රින්ගලද මන්ද එයාගෙ ඩෙනිම තැන් කීපයකින්ම ඉරිල තිබුනෙ..ඒත් මට හිතෙන්නෙ මීයො කාලද දන්නෙ නැහැ මොකද ඒකෙ ලොකු හිල් තිබුන උඩ හරියෙත්..ඉතින් එයා මගෙ ලඟින් වාඩිවෙලා ආගිය තොරතුරු අහන්න ගත්තම මට හිතුනෙ මං මේ ලෝකෙ තනි වෙලා නෑ නේද කියල.. සති දෙක තුනක් හැමදාම මං එතෙන්ටම වෙලා උදේට කෑවට..මෙය තමයි මුලින්ම ආව කෙනා..එයා හරි ස්වීට්..මට ගෙදර එක්ක යන්න තරම් හිතුනත් ආච්චි කැමති නැනේ සුදු කෙල්ලෙක් ගෙදර ගේනවට.. ඉතින් එයා කතාකරන ගමන් හිමින් සැරේ එයාගෙ බෑග් එක ඇරල ගත්ත ඇපල් එකක්..ඒක රතු ඇපල් එකක් වගේ පෙනුනට ඒකෙ පොත්ත විතරයි රතු..ඇපල් පොත්තෙ පාටයි..එයාගෙ කුඩේ පාටයි..එයාගෙ පාටයි..එයාගෙ ඇස්දෙකෙ පාටයි..ඔක්කොම එකතු උනාම හරියට දේදුන්නක් වගේ..මේ මහ වැස්සෙ මොන දේදුනුද? මනෝ උපරිම..ඔන්න ඔය වෙලාවෙ තමයි එයා මට පෙන්නුවෙ ඇපල් එකේ තිබුනු ස්ටැට් හෝම්වර්ක් එක..මෙය මගුලක් කතා කරනව..කොහොමද දෙය්යනේ මං එයාට අමු අමුවේ හෝම්වර්ක් එක කරල දෙන්නෙ..මම ශේප් එකේ ඊට සමාන ප්‍රොබ්ලම් ටිකක් පොතෙන් පෙරලල එයාට කියල දෙද්දි පැය දෙක පහුවෙලා විනාඩි 11ක්ම ගිහින්..ආයෙ සඳුද උදෙන්ම එන්නම් කියල එයා යද්දි මට ඉබේම කියවුනා..ඔයාමගෙ පළවෙනි එක්කෙනා කියල..එයාටත් ඒක අදහා ගන්න බැරිව තත්පර2ක් විතර ගොලුවෙලා..ඕ වාව්..කියල..මම හරි නයිස් කියල කොරොඩෝව දියේ ඈතට ගියා..මමනෙ දන්නෙ මම නයිස් නෙමේ..නෝටි කියල

සුබ නව වසරක් වේවා..!

2011-12-30T09:29:00.000-08:00

තව පැය කීපයකින් උදාවන නව වසර කිරියෙන් පැණියෙන් උතුරන..ලෝක විනාසයෙන් අවසන් නොවන එළමකිරි එකක් වේවා..!

එපික් බුෆේ..

2011-12-23T18:06:00.000-08:00

මම අද කියන්න යන්නෙ ටිකක් අමුතු නමක් තියෙන රෙස්ටුවරන්ට් එකක් ගැන..ඒකෙ නම එපික් බුෆේ..එපික් කියන වචනෙට විවිධ තේරුම් තිබුනත් මෙතන අදහස මට හිතෙන විදියට 'මාර බුෆේ' කියන එක..ලංකාව්දි අපි Buffet කියන එක බුෆේ කියල කියෙව්වට මෙහෙදි කියන්නෙ බෆේ කියල..මේ එපික් බුෆේ එක තියෙන්නෙ ඇමෙරිකාවෙ වෙස්ට් වර්ජිනියා ප්‍රන්තයෙ..මේකෙ විශේශත්වයක් වෙන්නෙ මේ බුෆේ එක තියෙන්නෙ කැසිනෝ එකක් ඇතුලෙ වීම..මේක තියෙන්නෙ හොල්වුඩ් කැසිනො එක ඇතුලෙ..මම කැසිනෝ එකකට ගිය පළවෙනි පාර මේක.. කලින් ලාස් වේගස් එයාර් පොර්ට් එකේ පොඩි සූදුවක් කෙලියාට..මේ වගේ ලොකු එකකට ගියාමයි..ඩොලර් සතයෙ ඉඳන් ලොකු ලොකු ගනන් වලට ඔට්ටු අල්ලන්න්න පුලුවන්.. මමනම් හැබැයි ඩොලර් 5ක් විතර පරාදයි...ඒක වෙනම කතාවක්..පොඩි පොඩි දිනුම් ලැබුනම වැඩි ගනන් වලට ඔට්ටු අල්ලන්න නිකම්ම හිතෙනව..අපිත් එක්ක ගිය රොබින් අය්යටනම් ඩොලර් සත5ක් ඔට්ටු ඇල්ලුවම ඩොලර් 35ක් දින්න..ඒකට වාසනාව තියෙන්න ඕනෙ.. ඉතින් මේ කසිනෝ එක ඇතුලෙ අස්ස රේස් එහෙමත් තියෙනව..

මත්පැන්, දුම්වැටි වලින් ඉතින් අඩුවක් නැහැ..කවුරුහරි දුම්වැටි බොන්නෙ නැත්නම් එආයට වෙනම කලාපයක් තියෙනව..ස්මෝක් ෆ්‍රී ඒරියා එකක්..තව අපි වගේ අයට ඕනෙ තරම් ස්ප්‍රයිට්,කොකා කෝලා ෆ්‍රී බොන්න පුලුවන්..

එපික් බුෆේ එකත් ඉතින් බුෆේ එකක්..ඒකෙ මාර මාර රහ කෑම ගොඩාක් තියෙනවා..ඕනෙ තරම් කන්න පුලුවන් එක පාරක් සල්ලි ගෙව්වම..බඩ පැලෙනකන් කන්න පුලුවන්..ඒත් ඉතින් බඩ ඉලාස්ටික් නෙමේනෙ..හිහ් හිහ්..

ඇමෙරිකාවේ පංචිකාවත්තට ගියෙමි..

2011-12-21T21:23:00.000-08:00

පංචිකාවත්ත කිව්වම කාටත් මතක් වෙන්නෙ වාහන අමතරකොටස්නෙ..බ්‍රෝකර්ල එහෙමත් නැත්නම් කාක්කො වැහිවැහැලනෙ..දන්නැති කෙනෙක් ගියොත් එහෙම නියමෙට අන්දනවනෙ..මම ළඟදි ගියා මෙහෙ තියෙනෙ පංචිකාවත්තකට..මෙහෙ ඒවට කියන්නෙ Junk Yard (ජන්ක් යාර්ඩ්) කියල..පාවිච්චි කරපු වාහන අමතර කොටස් තියෙන තැනක්..ඒවල කාක්කො එහෙම නැහැ..ඇතුලට යනකොට ටිcකෙට් එකක් අරන් යන්න ඕනෙ..ඒවගේම තමයි..සාම්පල්, එහෙම නැත්නම් අපිට ඕනෙ පාර්ට් එක අඇතුලට අරන් යන්න වෙන්නෙ නැහැ..හිතන්නකො ඔයාගෙ වාහනේට පාවිච්චි කරපු දොරක් ගන්න ගියා කියල..එකෙ සියිස් එක හරිද බලන්න ඒක Junk Yard එක ඇතුලට අරන් යන්න දෙන්නෙ නැහැ..ඇතුලෙ එක එක වාහන මොඩ්ල් එකට අයත් ඒව වෙන වෙනම නවත්වල තියෙනව..අපි ආයුධ (Tool Kit) අරන් ගිහින් ඒව ගලවගෙන අරන් එන්න ඕනෙ..නිකන් නෙමේ..ඒවට මිලක් තියෙනව..ගේට් එකෙදි ඒවට සල්ලි ගෙවන්න ගෙවන්න ඕනෙ..ඔක්කොම කම්පියුටර් එකකට ෆීඩ් කරල තියෙන්නෙ..එතකොට තමන්ට අවශ්‍ය පාර්ට් එක තියෙනවද කියල යන්න කලින් චෙක් කරන්නන්ත් පුලුවන්..මාරයි නේද?

අපි ගියෙ ස්ටාර්ටර් මෝටර් එකක් හොයන් එන්න..ඒකක් හම්බුනා..අලුතෙන් ගන්නවට වඩා 70%ක් විතර ලාබයි වැඩේ..හැබැයි ඉතින් පාවිච්චි කරපු ඒව..වාහන වලින්ම පාර්ට් එක ගලවගෙන් එන්න තමයි තියෙන්නෙ..ඒක නිසා හැමෝටම ඕක කරන්න බැහැ..මෙහෙ පොඩි දේකට උනත් වාහන repair එකකට $100 විතර තමයි බිල පටන් ගන්නෙ..ඒක නිසා පොඩි පොඩි වැඩ ඔය විදියට ..ගොඩ දාගන්න සමහරු බලනව..

ලේටස් කුරුම්බා ටෙක්නික්ස්....

2011-10-07T23:42:00.000-07:00

මෙහම කුරුම්බා බීල තියෙනවද?

කරුණාකර නිශ්ශබ්ද වන්න..

2011-09-24T20:49:00.000-07:00

බලන්න වටිනව..පළවෙනි විනාඩිය බැලුවොත් ඔක්කොම බලන්න හිතෙයි..

ගුවන් සූදුව...

2011-09-08T18:18:00.000-07:00

මං මේ කියන්න යන්නෙ සුදූ කෙනෙක් ගැන නම් නෙමෙයි..සූදුවක් ගැන..සූදු කිව්වට මේක එසේ මෙසේ සූදුවක් නෙමේ...මේක කැලේකවත්..එහෙමත් නැත්නම් හොරෙන් කරන දෙයක්වත් නෙමේ..මේක කරන්නෙ ප්‍රසිද්ධ ස්ථානයක..සූදුව කරන්නෙ ගුවන් තොටුපොළක කිව්වොත්...මං ටෙක්සාස් වල ඉඳල වර්ජිනියා වලට අගෝස්තු මුල සතියෙ සංක්‍රමනය වුනා..සංක්‍රමනය කිව්වට මට ඉතින් ඒ හැටි දෙයක් තිබුනෙ නැහැ අරගෙන යන්න..ඇඳුම් ටිකයි පොත් පත් ටිකයි විතරයි..මගෙ මාස්ටර්ස් එක ටෙක්සාස් වල ඉවර කරල වැඩිදුර ඉගෙන ගන්න වර්ජිනියා වල කැම්පස් එකකට යන්න ඕනෙ වුනා..

කැම්පස් එකක් හොයාගන්නනම් පුදුම ගේමක් තමයි දුන්නෙ...ගොඩාක් කැම්පස් වලින් මාව ගන්න කැමති වුනාට මට පාට් ටයිම් ජොබ් එකක් එක්ක දුන්නෙ මේ කැම්පස් එක විතරයි..මෙහෙ ජොබ් එකක් නැතුව ඉගෙන ගන්න තරම් අපේ තාත්ත ලංකාවෙ ඇමති කෙනෙක්වත් මංත්‍රී කෙනෙක්වත් නෙමේනෙ..ඒක නිසා පාට් ටයිම් ජොබක් සෙට් කරගන්න අනිවා ඕනෙ..එන්ගලන්තෙ ඕස්ට්‍රේලියා වගේ රටවල් වල නම් මගෙ යාලුවො ක්ලීනින් වැඩ, කුණු අදින වැඩ වගේ ඒව කරගෙන කට්ට කාගෙන ඉගෙන ගන්නව..ඒත් ඇමරිකාවෙ ස්ටුඩන්ට් වීසා වලින් ඒවගේ වැඩ කරන්න බැහැ..අපි ඉගෙන ගන්න දේට සම්බන්ධ දෙයක්..සතියකට පැය 20ක උපරිමයකට තමයි කරන්න පුලුවන්..කැම්පස් වලින්..ප්‍රොෆෙසර්ලට උදව්වට පේපර් බලන්න, ටියුට් උගන්නන්න එහෙමත් නැත්නම් අන්ඩග්‍රැඩ් ක්ලාස් එකක් උගන්නන්න වගේ ඒව සෙට් කරල දෙනව..ඒවලින් හම්බෙන ගානෙන් බෝඩිමටත් ගෙවල, යාන්තම් කාල බීල.. අවුරුදු දෙකක් විතර ඉතිරි කරල ලංකාවට ගිහින් එන්න ටිකට් එක ගන්න ඩොලර් 2000ක් විතර ඉතිරි කරගන්න පුලුවන්..

කොහොම හරි මට ටෙක්සාස් වල ඉඳන් වර්ජිනියා වලට යන්න ලාබම සහ ඉක්මන්ම ක්‍රමේ උනේ ප්ලේන් එකේ යන එක..යනකොට ලාස් වේගාස් වලින් බැහැල වෙනත් ප්ලේන් එකකට මාරු වෙන්න තිබුනා..ලාස් වේගාස් වලින් බැහැල අනිත් ප්ලේන් එක එන පැත්තට යනකොට මම දැක්ක සූදු පොළක්..ඔව් ඔව්..එයාර් පෝට් එක ඇතුලෙ..කට්ටිය ඒ මැශින් ළඟට වෙලා සූදු කෙලිනවා..සූදුව ලාස් වේගාස් වල නීති ගත කරල තියෙන්නෙ..එහෙ ලාස් වේගාස් වල සූදු විතරක් නෙමේ..ඕනෙම දෙයක් තියෙනව..මං කියන දේ තෙරෙනවනේ..එහෙට කියන්නෙ...පව් කාරයන්ගේ නගරය කියල..ලාස් වේගස් වලට ගිහින් තමන් කරල එන දේවල්..ගිහින් ඇවිත් කාත් එක්කවත් කියන්නෙ නැහැ..ඒ මතකයන් වේගාස් වලම තියල එනව කියලයි කියන්නෙ..ඉතින් ලාස් වේගාස් වල සූදු පොළවල් තියෙන නිසා තමයි එයාර් පෝට් එකෙත් ඒවට ඉඩ සලසලා තියෙන්නෙ..

සමහර වෙලාවට මං වගේ එතනින් ප්ලේන් වලින් මාරු වෙන අයට සූඩු කරන්න වෙන්නත් ඇති ඕව දාල තියෙන්න..මමත් ඉතින් පොඩ්ඩක් කැරකිලා බලල ආසාවටත් එක්ක අඩුම ගානක් දාන්න පුලුවන් මැශිමක් ලඟින් වාඩිවුනා..මට තේරුනේ නැහැ ඒක කරන්න..මම ඉතින් ඒක බලාගන්න එක්කෙනාගෙන් අහල වැඩේ පටන් ගත්ත..ඩොලර් එකක් තමයි දැම්මෙ..පලවෙනි පාර මම දිනුම්..දාපු ගානම ආපහු දින්න..දැන් ඉතින් ආසාව හරි..නැගිටල යන්නත් හදල..ආයෙ ඔහෙ ඕන එකක් කියල ආයෙ ඔට්ටු ඇල්ලුව..මේපාර පරාදයි..දුක තමයි රංජනී කියල නැගිටලා ගියා මගෙ ප්ලේන් එක එන ටර්මිනල් එක පැත්තට..තන්හාය ජායතී සෝකෝ කියන්නෙ කට කහනවට නෙමේනෙ..

අයිරින්ව ඉම්ඹෙමි..

2011-09-07T15:47:00.000-07:00

සමහරවිට මතක ඇති ඔයාලට සති දෙකකට කලින් මංකිව්ව අයිරින් මග එනව කියල...අයිරින් එනකොට අපිට වෙන පළාතකට යන්න කියල කිව්ව..එහෙම යන්න කිව්වට පස්සෙ ගියෙ නැත්නම් ඒක දඬුවම් ලැබිය හැකි වරදක් සහ හදිසියෙ අන්තුරක් වුනොත් බේරගන්න එන්නෙ නැහැලු..එහෙම කරන්නෙ ඒ වගේ වෙලාවට බේරගන්න එන අයගෙ ජීවිතත් අවදානම් නිසා..මං කලින් හිටියෙ ටෙක්සාස් වල කාන්තාරයක..මෙක්සිකෝවට ලඟින්..මගෙ කලින් පෝස්ට් බලපු අයට මතක ඇති..මෙහෙට ඇවිල්ල සති දෙකක් යන්න කලින් භූමි කම්පාවක් ඇතිවුනා..ඊට පස්සෙ තමයි ඔය අයිරින් ආවෙ..

මෙහෙ ඉන්නව තව ලංකාවෙන් ඇවිත් ඉගෙන ගන්න අය්යල අක්කල කීපදෙනෙක්..ඉතින් අපි කට්ටිය ගංවතුර අවදානමක් නැති පැත්තක ඉන්න ලංකාවෙ අය්ය කෙනෙකුගේ අක්කකෙනෙකුගෙයි අපාර්ට්මන්ට් එකට ගියා...වතුරයි කරන්ට් එකයි නැති වෙයි අයිරින් ආවම කියල අනතුරු අඟවල තිබුනෙ..කොච්චර කල් එතන හිරවෙලා ඉන්න වෙයිඩ කියල කිසිම අදහසක් නැති උනත්, ඒ අය්යයි අක්කයි අපට එන්න කිව්ව ඒගොල්ලොත් එක්ක ඉන්න..අපි 10 දෙනෙක් විතර හිටියා..වතුර එකතු කරල තිබුනත් හදිසියකට ගන්න කියල, ඒ ටික ඔය දහදෙනාට දවසකටවත් මදි..ඒ අවදානමත් අරන් අපිට නවාතැන් දුන්න එකට ඒ අය්යටයි අක්කටයි ගොඩාක් පින් දෙන්න ඕනෙ..සෙනසුරාද හවසට තමයි අපි ඉන්න හරියට අයිරින් එනව කියල තිබුනෙ..සෙනසුරාද උදේ වහින්න පටන් ගත්ත..ටික ටික හුලං වැඩිඋනා..ඒත් එක්කම අපි හිටපු හරියටත් ටෝර්නේඩෝ වෝර්නින් එකක් දුන්න..පෙර කරල තිබුන පිනකටවගේ, ටොර්නේඩෝ එකක් නම් ආවෙ නැහැ..ආවනම් ඉතින් අපේ කෑලිවත් ඉතිරි වෙන එකක් නැහැ..

දවල් වෙද්දි හුලං පොඩ්ඩක් අඩු උනා..අපිත් එක්ක හිටපු අය්ය කෙනෙකුයි අක්ක කෙනෙකුයි කිව්ව යමුද බීච් එකට බලන්න කියල..අපිත් එක්ක හිටපු ගොඩාක් අය කිව්ව යන්න එපා කියල..ගස් වැටිල, ගංවතුර වගේ අනතුරු නිසයි එහෙම කිව්වෙ..අනික ඒවෙලාව වෙනකොට අයිරින් වර්ජිනියාව ළඟටම ඇවිත් තිබුනෙ..ඉතින් අපි ගෙදරින් එලියට බහිනවට කවුරුත් කැමති වුනේ නැහැ..අපි එක කාර් එකක 6 දෙනෙක් ගියා..ටක් ගාල එන්නම් බීච් එකට ගිහින් කියල..බීච් එකට යනකොට හුලං හොඳටම තදයි..කොච්චර හුලං තදයිද කියනවනම්..වැහි පොද එක්ක හුලං විතරක් නෙමේ ආවෙ..මුහුදු වෙරලෙ තියෙන වැලිත් ආව..චට පට ගාල ඇවිත් වදින්න ගත්ත ඇඟට..හුලඟේ වේගය පැයට කිලෝ මීටර් 60ක් වත් තියෙන්න ඇති..මුහුදෙ රැළත් මාර සැරයි..ඇස් ඇරගෙන ඉන්නත් හරි අමාරුයි..අපි ටික වෙලාවකට පස්සෙ එතනින් ගෙදර එන්න පිටත් උනා..මග දිගට ගස් වැටිල එහෙමත් තිබුනා..සමහර තැන් වල ලයිට් කණු එහෙමත් පාරට වැටිල..සමහර පාරවල් වහල තිබුන..පාරෙ ට්‍රැෆික් ලයිට් එහෙම වැඩ කලෙත් නැහැ..සමහර තැන් වල අපවහන කානු උතුරල පාරෙ වතුර මල් විදියට තිබුනා..ඒවලින් එලියට ආව දේවල් ගැනනම් මතක් කරන්නත් කැමති නැහැ...කොහොමහරි..කරදරයක් නැතිව අපිට ආපහු අය්යලගෙ අපාර්ට්මන්ට් එකට එන්න පුලුවන් වුනා..කොහොමහරි..අයිරින් ගෙන් අපිටනම් ලොකු කරදරයක් උනේ නැහැ..ඉරිද හවස් වෙනකොට මම මගෙ අපර්ට්මන්ට් එකට ආව..කරන්ට් නම් තිබුනෙ නැහැ දවසක් විතර..කවුද හිතුවෙ ඇමෙරිකාවෙදිත් ඉටි පන්දම් එලියෙන් ඉන්න වෙයි කියල...අපාර්ට්මන්ට් එක හරියටනම් ගංවතුර ඇවිත් තිබුනෙ නැහැ..පොඩි පොඩි ගස් ඇතු වැටිල තිබුනත්..වහලෙට වත් මොකුත් වෙලා තිබුනෙ නැහැ..කැම්පස් නම් දවස් දෙකකට පස්සෙ ආපහු පටන් ගත්ත..ඒක ලොකු දෙයක්..ඔය යටින් දාල තියෙන්නෙ අයිරින් එනකොට ගත්ත පොටෝ ටිකක්..ඒකනම් අමතක නොවෙන අත්දැකීමක්..ආයෙනම් කුණාටු එන්න එපෝ..

බලාගෙන ලීස්..ලිස්සයි..

2011-09-07T15:07:00.000-07:00

බලාගෙන ලීස්..ලිස්සයි..හිහ් හිහ්..ඇයි හිනා..නෑ, මට මතක් උනා..

මොකක්ද..අවුරුදු ගානකට කලින්..ඉතින් මොකක්ද උනේ කියන්නකො ඇලෙක්ස්..

දවසක් පාක් එකේදි මාව වැස්සකට අහුවුනානෙ..ඉතින් ඊට පස්සෙ..හයියෙන් වහින්න ගත්ත..කුඩයක් තිබ්බෙත් නෑ..ගහක් යටට වෙලා හිටියෙ..එතනින් ගිය ලස්සන කෙල්ලෙක් නැවතිලා ඇහුව...එනවද කුඩේ යටට කියල..හිනා වෙලා මාත් ගියා කුඩේ යටට..යන්න පටන් ගන්නකොටම එයාව ලිස්සුව..මං හය්යෙන් අල්ලගත්ත..වැටෙන්න දුන්නෙම නෑ..ආයෙ කවදාවත් එයාව..අත ඇරියෙත් නෑ..ඔහ්හ්..ඇලෙක්ස්..

ප.ලි.

අපි ගියා වර්ජිනියාවල තියෙන නැචුරල් බ්‍රිජ් එක බලන්න..එතනදි වැස්සකට අහුවුනා..වැස්ස පායනකම් ඉන්න කොට තමයි මේ දෙන්නව දැක්කෙ..ආදරය තරුණයි..හැමදාම..

නැචුරල් බ්‍රිජ් එක ගැන පස්සෙ ලියන්නම්..

එයා එනවලු..(අයිරින්)

2011-08-25T20:01:00.000-07:00

එයා එනවලු

මාර වේගෙන්

ගස් පඳුරු ගලවගෙන

ගෙවල් කඩාගෙන

මුහුද ගොඩ ගලයිලු

ගඟ උතුරයිලු

අපිට යන්නලු

ගෙවල් අත ඇරල

කොහේ යන්නද

කවුරු ගාවටද

ඔබාමා..ඔබාමා..

අයිම් හියර්...

ප.ලි. මම මෙහෙට ඇවිල්ල තාම සති තුනයි..අඟහරුවාදා බූමිකම්පාවක් උනා..දැන් කුණාටුවක් එන්න යනව..ටෙක්සාස් වල හිටපු අවුරුදු දෙකේම අවුලකට තිබුනෙ පට්ට අව්ව විතරයි..!

වඳුරට දැළිපිහිය වෙනුවට තුවක්කුවක් හම්බුනොත්..

2011-07-09T20:07:00.000-07:00

මේක බලන්න..සෙල්ලම් නෑ නේද?

ළඟදීම දවසක වඳුරා මිනිසාව පරදාවි?
වෙලාව තියෙනව නම්...ඉන්ටෙර්නෙට් ස්පීඩ් නම්..මේකත් බලන්න..

රුපියල් 1000

2011-06-18T10:55:00.000-07:00

මම ඉන්නෙ ඇමරිකනු මෙක්සිකන් දේශසීමාවට ඉතා ආසන්න ඇමෙරිකානු නගරයක..මගේ ලංකාවෙ යලුවෙක්ගෙ පාස්පොර්ට් එක වතුරට වැටිල තෙමුනු නිසා..ඒකෙ පොඩි වැඩකට අපි දෙන්න ඊයෙ හවස ගියා ඇමරිකාවට මෙක්සිකොවෙන් එන දොරටුවකට..අපිට පයින් යන දුර..සිංහලෙන් කියනවනම් ඉමිග්‍රේෂන් ඔෆිස් එකට..

දවසකට දස දහස් ගනන් මෙක්සිකන් ජනතාව මෙම දොරටුව හරහා යනව..ඉගෙන ගන්න...වැඩ කරන්න..බෙහෙත් ගන්න..යනාදී වශයෙන්..ඇමෙරිකාවට මත් කුඩු එන්නෙ මෙක්සිකෝවෙන් නිසා...දොරටුවේදී සෑම මගියෙක්ම, වාහනයක්ම පරීක්ෂා කරනව...අපි ගියෙ අයි94 කියන පත්‍රිකාව අලුත් වැඩියා කරගන්න..එතනදි අපිට පෝළිමේ ඉන්න උනා පැය 3ක් විතර...මගේ මිත්‍රයා මගෙන් ඩොලර් 10ක් ඉල්ල ගත්ත හදිසියෙවත් ගාස්තු වශයෙන් ගෙවන්න උනොත් කියල..එතනදි අපි ගාව හිටිය මෙක්සිකන් කිහිපදෙනෙක් මගෙන් ඇහුව, අපේ රටේ සල්ලි නැද්ද බලන්න කියල...අපි ගාව තිබ්බෙ මොනර කොලයක් විතරයි..ඒකෙ වටිනකම කීයද ඇහුව..මම කිව්ව ඩොලර් 10ක් විතර කියල..

ඩොලර් 10ක් දෙන්නම් දෙනවද..

බැහැ..

ඩොලර් 50ක්..?

බැහැ..

ඩොලර් 100ක්?

ම්ම්..සලකා බලන්නම්..

ඒගොල්ලො මොනර කොලේට කැමතියි වගේ..එකෙ තියෙන අර දිලිසෙන පටිය ගැන එහෙම ඒගොල්ල කතා වෙනව..ඉමිග්‍රේෂන් ඔෆිස් එකෙන් එලියට ගියාම ගන්නම් කිව්ව..ඒක මිළට ගන්නම් කිව්ව මෙක්සිකන් පුද්ගලයා කව්බෝයි තොප්පියක් දාගෙන කිඹුල් හමකින් හදපු බූට්ස් දෙකක් දාගෙන හිටපු නිසා අපි ටිකක් බය උනා..අපි පෝළිමේ ඉස්සරහ හිටපු නිසා ඒගොල්ල එන්න කලින් වැඩේ ඉවර උන ගමන් ශේප් එකෙ මාරු උනා..

මෙක්සිකොවේ අපට ආසන්නම නගරය ලොකේ මාරන්තිකම නගරයයි..එහෙ මත් කුඩු ජාවරම්කාර දෙපිරිසක් අතර යුද්ධයක් තියෙනව...එක නිසා දවසකට කිහිපදෙනෙක් වෙඩිතියල මැරෙනව...ඔය වගේ හේතු නිසා එහෙ ඉන්න මිනිස්සු ගැන ටිකක් බයයි..කොහොම උනත් මම දෙපාරක්ම මෙක්සිකොවට ගියා..ඒ කතාව පස්සෙ ලියන්නම්..
කොහොම හරි මම කියන්න ගියෙ..ලංකාවෙ රුපියල් 1000 නෝට්ටුවට රුපියල් ඩොලර් 100ක ඉල්ලුමක් තිබුනා..සෙල්ලම් නෑනේද?

කූඹි ගමන්

2011-05-29T12:16:00.000-07:00

ඇයි කූඹි හැමවෙලේම එකට යන්නෙ කියල දන්නවද?

his 5

2011-05-27T22:27:00.001-07:00

එස් 5 ෆ්‍රිඩ්ජ් එකට

දංකුඩ ඇඹුල් මදිවට

බෝතල් කෑන් එළියට

හිස් බව පෙනේ කදිමට..

අලිගැටපේර සැන්ඩ්විච්...

2011-04-30T19:47:00.000-07:00

කාලෙකින් මොකුත් ලියන්න බැරිඋනා..ඒක හින්දමත් නෙමේ අද ලියන්නෙ...ඊයෙ ටිකක් අමුතු ජාතියෙ කෑමක් සෙට් උනා..ඉතින් ඒක ගැන ලියන්න හිතුනා...මෙහෙ තියනව Chili's කියල restaurant ජාලයක්..ඒකට මුලින්ම ගියෙ ඊයෙ..ගොඩාක් බඩගිනි වෙලාවක ගියෙ..ඕඩර් කරල පැය බාගයක් විතර ගියා මේසෙ උඩට එන්න..මංනම් Chillige ගෙදර කට්ටිය මතක් කරකර හිටියෙ..ඒත් මෙහෙ උන්ට නම ඒක හුරුයි වගේ..අයිස්ඩ්ටී එකක් බිබී විකාර දෙවල් කියව කියව හිටිය...ජාති ගොඩාක් තිබුනට මෙනු එකේ..මොනව ඕඩර් කරන්නද කියල හිතාගන්න බැරුව හිටියෙ..පින්තූරෙ ලස්සන නිසාත්, නම ටිකක් අමුතු නිසාත් ඕඩර් කලා කැලිෆෝනියා ක්ලබ් සැන්ඩ්විච් එකක්..ටික වෙලාවකින් ඔන්න බඩු ආව..ටෝස්ට් කරපු පාන් පෙති දෙකක් අතර තක්කාලි,චීස්..යනාදී දේවල් අතර කොලපාට කුට්ටියක්..මගුලයි..මේ නම් අලිපේරමය..පාන් එක්ක අලිපේර..මෙහෙ අලිපේර වල ගිල්වල (avocado dip) එක එක දේවල් මෙක්සිකන් අය කනව කියල දැනගෙන හිටියට ඇමරිකන් කෑමවල තියෙනව කියල දැනගෙන හිටියෙ නෑ...පාන් එක්ක මොන අලිපේරද..ශේප් එකෙ එව ටික අයින් කරල අනිත් ටික කෑව..ඇමරිකන් අය දැවිල්ල කන්නෙ නෑ..උදේට කන්නෙත් ගොඩක් වෙලාවට පැණිරස ඒව..දැවිල්ල සෝස් වෙනුවට සමහර වෙලාවට මීපැණි දාගෙනත් කනව..ආයෙ වෙලාවක ලියන්නම් කෑම ගැන..දැන් යන්න ඕනෙ මොනවහරි උයාගන්න..කඩෙන් මාසෙකට දවසකට වඩා කන්නතරම් සල්ලි නෑ තාම..ඒක නිසා උයාගෙන තමයි කෑම..මේපාරනම් නැකතට රයිස් කුකර් කිරිබත් කන්න බැරිඋනා අවුරුද්දට..උයන්න තිබුනෙ මෙහෙ වෙලාවෙන් උදේ පාන්දර 1ට විතර..ඒක නිසා පස්සෙ දවසක තමයි කිරිබත් කෑවෙ..

මුරලිදරන් මටද කතා කලේ..

2010-11-11T21:08:00.000-08:00

අලුත් සෙමෙස්ටර් එක අගොස්තු අන්තිම සතියෙ පටන් ගත්ත..අලුතෙන් කැම්පස් එකට ඇමරිකන් සිසුන් වගේම අපි වගේ පිට රටවල්වලිනුත් කට්ටිය ආව..ඉන්දියාවෙනුයි චීනෙනුයි තමයි ඉතින් ගොඩක් අය එන්නෙ..ළඟදි ආව ඉන්දියන් ලමයෙක් නැවතිලා ඉන්නෙ මගෙ apartment එකට අල්ලපු එකේ..එක දවසක් විතර තමයි මට කතා කරන්න හම්බුනේ..මිනිහගෙ නමවත් මට මතක හිටියෙ නෑ..මිනිහටත් එහෙම වෙන්න ඇති...

එක දවසක් කැම්පස් එකේ ලෙක්චර්ස් ඉවර වෙලා apartmentඑකට එන්න එනකොට මගදි මට ඇහෙනව..මුරලිදරන් ..මුරලිදරන් ..කියල කෙනෙක් කෑගහනව..නිකමට වගේ හැරිල බලන කොට..අර මං කලින් කිව්ව ඉන්දියන් අසල්වැසියා මට කතා කරනව..මිනිහට මගෙ නම මතක නැති නිසා තමයි කිඩ්නිය පාවිච්චිකරල මුරලිදරන් කියල කෑගහල තියෙන්නෙ..මෙහෙ ඉතින් ඔය වගේ ලංකාවෙ නමක් ඇහුනම අනිවා ඉතින් ඒ පැත්ත බැලෙනව...මිනිහගෙ මොලෙත් නරකම නෑ නේද?

කකුළුවො නම් ලංකාව..ලංකාව නම් කකුළුවො

2010-08-27T22:22:00.000-07:00

අද දවල් මං වැඩකරන ඔෆිස් එකේම වෙන සෙක්ශන් එකක වැඩකරන චීන ගැහැණු කෙනෙක්, කතාවට සෙට් උනා..මාස තුනක් විතර එතන වැඩකලත්, එයාලත් එක්ක අද තමයි කතාකලේ..ඒගොල්ලන් හිතන් ඉන්නෙ මං වැඩි සද්ද නැති කෙනෙක් කියල..(:දිව දොට්ට )

එයානම් ලංකාව කිව්වම දන්නව..කොළඹ කිව්වමත් දන්නව..මෙහෙ ඉන්න ගොඩක් උන් ලංකාව කිව්වම අහන්නෙ ඉන්දියාවෙ කොයි හරියෙද ලංකාව තියෙන්නෙ කියල..එපාවෙනව..

කොහොම හරි මගෙන් අහනව ලංකාවෙ බහුතරය හින්දු ආගම අදහන දෙමළ අය නේද? ඇයි එතකොට කොටි සංවිධානය යුද්ධයක් කලේ කියල..පිස්සු හැදෙනව..යාන්තම් කඩ්ඩෙන් පැහැදිලි කලා..එතකොට එයා කියනව..ඒක තමයි මාත් බැලුවෙ කොටින්ට...තමන්ගෙ මිනිස්සුන් එක්කම ගහගන්නෙ කියල..උත්සාහය සාර්ථකයි..ඒක යන්තම් ගොඩ දාගත්ත කියමුකො..

ඊට පස්සෙ තමයි හොඳම හරිය..ලංකාව ප්‍රසිද්ධ කකුළුවන්ට නේද?..මට එපාම වුනා..

ලංකාවෙ කකුළුවො මාර රහයි..වෙන උන් වගේ නෙමයි..ලොකුයි..

අප්‍රසන්න සහගත් හැඟීමක් ආවත් ශේප් එකේ මං කිව්ව රට යවන්න වෙනම උන්ව වගා කරනව කියල..

චීන මිනිස්සු දන්නෙ කකුළුවොනම් ලංකාව..ලංකාවනම් කකුළුවොලු..

ඉන්දියන් සාගරේ මොකක්ද කියලත් කියනව නේද ලංකාවට කියල ඇහුව..ඔව්..ඔව්..මුතු ඇටය කියල මං ශේප් එකේ මාරු උනා..ආසියාවේ ආශ්චර්යය ගැන ඇහුවොත් එහෙම!!

Toro ද? Vaca ද?

2010-07-09T00:16:00.000-07:00

මාර කේස් එකක්නෙ මට උනේ..ගියසුමානෙ දවසක ඉන්ටෙර්න්ශිප් යාලුවොත් එක්ක ආයෙත් ලන්ච් එකකට රෙස්ටෝරන්ට් එකකට යන්න වුනා..ගියපාර ගිහින් රට කජු කාපු හැටි මතකනෙ..මේක ටිකක් මෙක්සිකන් ස්ටයිල් රෙස්ටෝරන්ට් එකක්..ඒත් මම නම් කෑවෙ බර්ගර් එකක්..අඩුම ගානට තිබුන එක..ලොල්..

කාලෙකින් අයිස් ටී එකකුත් බිව්ව..අවුලක්ම නෑ..සුපුරුදු ඇරගැනීම්, විහිලු තහළු සිද්දවුනා..කඩ්ඩෙන් තමයි ඉතින්...

අයිස් ටී එක බිව්ව නිසාද කොහෙද මට පොඩි අවශ්‍යතාවක් ආව..ලොකු එකක් නෙමේ..ලොල්..

මගෙ යාලුවෙකුත් පොඩ්ඩකට කලින් ගිහින් වැඩේ කරල ආව..කිසි ප්‍රශ්නයක් නැතුව..මමත් ඉතින් වොශ් රූම් එක තිබුන පැත්තට ගියා..දොරවල් දෙකක් තිබුනා..හැබැයි පොඩි අවුලක් තිබුනා..එක දොරක ගහල තිබුනා "Toro" කියල..අනිකෙ ගහල තිබුනෙ "Vaca" කියල..මගුලයි..එච්චරයි තියෙන්නෙ..වෙන රූපයක් වත් මුකුත් නෑ..

දැන් මොකක් තොරගන්නද කියල හිතාගන්නවත් බෑ..10,20 ගැනල යන්නත් බෑනෙ..වැරදුනොත් එහෙම..ගුටි කන්නත් වෙනවනෙ..

මම ශේප් එකේ ඇවිත් යාලුවෙක්ගෙන් ඇහුවමයි සීන් එක තෙරුනේ..Toro කියන්නෙ Spanish වලින් හරකට..කියන්නෙ Vaca එළදෙනට..මෙක්සිකන් වොශ් රූම් වල එහෙමලු ඒදෙක වෙන්කරල නම් කරන්නෙ..කවුද දන්නෙ ඕව..(මෙක්සිකානුවන් කතා කරන්නෙ Spanish වලින්..)

යන්තම් ගුටි නොකා බේරුනා..

කඳුල ඉතින් සමාවෙයන් 2..

2010-06-26T21:50:00.000-07:00

කඳුල ඉතින් සමාවෙයන්..

අපි වෙන්වෙමු අද හවසට..

මගෙ ගෙපැලට ඈ එනවා..

සිරියහනේ තනි රකින්න..

බලන්නකො දැන් මොකද වෙලා තියෙන්නෙ කියල.. :)

බිළිදු ගෙනා කිරි සුවඳක්..ගෙපැල දොරින් හමායයි වගේ නේද ළඟදීම..

ගුවන් කෑම..

2010-06-15T20:55:00.000-07:00

මේක මට සිද්දවුනේ මං ලංකාවෙන් එනකොට..මට මෙහෙ එන්න වැඩ ටික සෙට් උනේ අන්තිම මොහොතේ..ඒක නිසා ප්ලේන් එකට ටිකට් බුක් කරන්න එහෙමත් වැඩිදවසක් තිබුනෙ නෑ..වීසා ඉන්ටවීව් එක ගොඩගිය දවසෙම ටිකට් බුක් කරන්න වෙලා තිබුනෙ..මොකද මට සතියකින් මෙහෙට එන්න වෙලා තිබුනා..ඉතින් මම ගිය ලංකාවෙ ප්‍රසිද්ධ බැංකුවක් මගින් පවත්වාගෙන යන ටිකට් ඒජන්සි එකකට...බොරැල්ල ශාඛාවට තමයි ගියෙ..අන්තිම වෙලාවෙ නිසා උන් කියන ගානටම ගන්න උනා..අඩු කරල ඉල්ලුවත් උන් අඩුකරන්නෙ නෑ ඔයවගේ වෙලාවට..මොකද උන්ට එන කුට්ටිය වැඩිනිසා..කොහොමහරි ඉතින් ටිකට් එක බුක් කරල ඉවර උනාම ටිකට් එක බුක් කරපු එකාට ආතල් එකක් ගිහින්ද මන්ද..මගෙන් ඇහුව
"සර්..ස්පෙෂල් මීල් එකක් දාමුද? "
"ඕනෙ නෑ.."
"නෑ සර්..ගාන වෙනස් වෙන්නෙ නෑ..දාමු නේද?"
"මොනවද තියෙන්නෙ? "
"ඉන්න මම සර්ට හොඳ එකක් දෙන්නම්..අපි Kosher මීල් එකක් දාමු..?"
"ඒකෙ මොනවද තියෙන්නෙ?.."
"සී ෆූඩ්ස්.."
"ආ හරි..ඒක දාන්න එහෙනම්.."
"මේක සර් හම්බෙන්නෙ සාමාන්‍ය කෑම එකට අමතරව.."
කියල ඌ පොර ටෝකක් දැම්ම..
"සර් එහෙට ගිහින් එහෙනම් අපිට ඊමේල් එකක් එවන්නකො..අඳුන්න අයටත් කියන්න ඇපි ගැන..සුබ ගමන් සර්.."

පාන්දර දෙකට විතර තමයි කටුනායකින් ගුවන්ගත් උනේ..ශ්‍රීලන්කන් එයාර්ලයින්ස් වලින්..ලන්ඩන් වලට ගුවන් කාලය පැය 15ක්ද කොහෙද මතක විදියට..
ටික වෙලාවකින් එයාර්හොස්ටස් නංගි කෙනෙක් ඇවිත්..
"සර්ට ස්පෙෂල් මීල් එකක් ඕර්ඩර් කලාද? "
"ආ ඔව්.."
"ඉන්න සර් අපි අරන් එන්නම්.."
සිනාමුසු මුහුණින් ඒ නංගි ගියා..

විනාඩි 5කින් විතර..
"සර් මේක සර් කඩල දෙනවද..නැත්නම් අපි කඩල මයික්‍රෝවේව් කලාට කමක් නැද්ද? "
ඒ නංගි මට පැකින් එකකින් වැසුනු පෙට්ටියක් පෙන්නුව..මට තේරුණා මෙතන මොකක් හරි අවුලක් වෙලා තියෙනව කියල..
"මට මේගැන කිසිම දැනීමක් නෑ..මොකක්ද මෙතන වෙන්නෙ..?"
"සර්,Kosher මීල් කියන්නෙ යුදෙව් අය කන කෑමක්..ඒක ආගමික නීතියක් විදියට..කෑම එක කන එක්කෙනා තමයි කඩල ඇරල දෙන්න ඕනෙ අපිට.."

මගුලයි..මම යුදෙව්වෙක්ද?

මොනා කරන්නද..පැය 15ක් බඩගින්නෙ ඉන්නත් බෑනෙ..මම ශේප් එකේ නංගිට කිව්ව..ට්‍රැවල් ඒජන්ට් තමයි බුල කෙලියෙ කියල..ඒ නංගිට සහ ශ්‍රීලංකන් එයාර්ලයින් සුහදශීලී කාර්යමණ්ඩලයට පින්සිද්දවෙන්න..මට සාමාන්‍ය කෑම වේලක් ලැබුනා..අර ට්‍රැවල් ඒජන්ට් පොර ටෝක් දුන්නට..ඒක අමතර කෑම වේලක් නෙමේලු..අනිත් අයට පැස්ට හරි නූඩ්ල්ස් හරි දෙනව වෙනුවට, මට දෙන්න නියමිත වෙලා තිබුනෙ අර යුදෙව් කෑම ජාතිය..
කොහොමහරි ඉතින් ලන්ඩන් ගියා කියමුකො..ඊට පස්සෙ මට ගන්න තිබුනෙ ඇමරිකන් එයාර්ලයින්ස් එකේ ෆ්ලයිට් එකක්..

අරූ දිගටම බුල කෙලපුබව දන්න නිසා..මම ප්ලේන් එකට නැග්ගගමන් ගියා ප්ලේන් එකේ කුස්සියට..මොකද ඕක කඩ්ඩෙන් පැහැදිලි කරන්නත් ඕන නිසා සහ මගෙ කඩු ඇක්සන්ට් එක ඇමරිකන් ඇක්සන්ට් එක ලඟින්ම යන නිසා..ලොල්..

ඇමරිකන් එයාර්ලයින්ස් වල ඉන්නෙ ශ්‍රීලන්කන් එකේ වගේ ලස්සන අක්කල නංගිල නෙමෙ..නපුරු ආච්චිල..වයස 60 ගනන් විතරවන..හදවතේ පොඩ්ඩක්වත් තෙතමනයක් නැති කට්ටියක්..එයාලට අපි ප්ලේන් එකේ ගියත් එකයි..නැතත් එකයි..පොඩි ළමයෙක් ඇඬුවොත් එහෙම අම්මටයි තාත්තටයි හොඳටම දෙහිකපල, අර ළමයටත් ඔරවල යන්නෙ..

සීට් නොම්බෙර් එක චෙක්කරල කිව්ව..Kosher මීල් කතාව..මට ඉතින් ට්‍රැවලගෙ මුලු පරම්පරාවම සිහි වෙනව..
මං ආච්චිට බොහොම ගරුසරු ඇතිව කිව්ව සිද්දිය..මෙන්න මගෙ ඇඟට කඩාපැනල කිව්ව..
"අපි ගාව විසිකරන්න කෑම නෑ..කරන්න දෙයක් නෑ කියල.."
සොරි ඩොට්කොම්..
"අවුලක් නෑ"
කියල..මම ඇවිත් වාඩිවෙලා..තව පැය 12කින් ඇමරිකාවේ පයතැබීමේ ආසාවෙන් ජනේලයෙන් එලිය බලන් හිටිය..දන්නෙම නැතිව මට නින්ද ගිහින්..පැය ගානකින් ඇහැරල බලනකොට මගෙ ඉස්සරහ තියෙන මේස කෑල්ලෙ..මගෙ කෑම පංගුව තියල තිබුන..Kosher නෙමේ..මාර හැපි..

ආච්චිට දුක හිතෙන්න ඇති..

ගමනින් පස්සෙ අරූට ඊමේල් එකක් ලුණු ඇඹුල් ඇතිව යවන්නත් හදල..ආයෙ මොකටද කියල නිකන් හිටියා..මමනම් දන්න දන්න අයට කියන්නෙ..එතෙන්ටනම් යන්න එපා කියල ටිකට් බුක් කරන්න..

ඔයින් ගියා මදැයි..

රට කජු පොතු..

2010-06-13T12:10:00.000-07:00

මට ඊයෙ මෙහෙ යාලුවො කීපදෙනෙක් කතාකළා දවල්ට කන්න රෙස්ටෝරන්ට් එකකට යන්න..ලංකාවෙදිනම් එහෙම කවුරු හරි කතාකළාම දෙපාරක් හිතන්නෙ නැතිව අපි යනවනෙ..මොකද ගොඩක් වෙලාවට බිල ගෙවන්නෙ ඒ අඬගහගෙන කෙනානෙ..මෙහෙ එහෙම නෙමේ..එකට ගියත්..ගොඩාක් වෙලාවට තම තමන් තමයි බිල ගෙවන්නෙ..ඒත් ඉතින් මම මේ දවස්වල සමර් ඉන්ටර්න්ශිප් එක කරන තැන යාලුවො ටිකක් නිසා නොගිහින් බැරිකමට මාත් ගියා..යනකොටම මම ඩොලර් 20ක විතර ආසාව අතහැරල ගියෙ..සාමාන්‍යයෙන් මම උයාගෙන කන්නෙ..ඩොලර් 20න් සතියක් විතර හොන්දට කන්න පුලුවන් මට..ඒත් ඉතින් වෙලාවෙ හැටියට නොගිහින් බැරිඋනා..

අපි ගියෙ "Texas ROADHOUSE" කියන රෙස්ටෝරන්ට් එකට..ඔය ගොල්ලන් කවුබෝයි ෆිල්ම්ස්.. එහෙම නැත්නම් චක්නෝරිස් ඉන්න ෆිල්ම්ස් බලල තියෙනවනම් දැකල ඇති..ලීවලින් හදපු තැනක..ලොකු බියර් වීදුරු වලින් බියර් බොන ..දිග රැවුල් තියෙන කට්ටිය ඉන්න..අන්න ඒවගේ එකක්..බිත්ති,වහලය,පුටු,මේස...හැම එකක්ම ලී..ඒවගේම ත්මයි ලස්සන වේට්‍රස්ල..සිනාමුසු මුහුණින් ඉතාම මිත්‍රශීලීව ඉන්නෙ ඒගොල්ලන්..

හැම මේසයක් උඩම යකඩ බාල්දි දෙකක් තිබුනා..එකක රටකජු පුරවල..අනික මුනින් නමල..ඕඩර් කරපු කෑම හම්බෙනකම් කට්ටිය රටකජු කන්න පටන් ගත්ත..කාල රටකජු පොත්ත බිමට විසිකරනව..මට ඒක එච්චර හරිනෑවගේ කියල හිතුන නිසා මම කලේ පොතුටික මේසෙ උඩ තිබුන කොලයක් උඩින් තියපු එක..කට්ටිය මට හිනාවෙන්න ගත්ත..ඒගොල්ල කිව්ව රටකජු පොත්ත බිමට දාන්න..ඒක බිමට දාන්න ඕනෙ දෙයක් කියල.. ඒ රෙස්ටෝරන්ට් එකේ සිරිත ඒකලු..පිස්සු හැදිලා ආයෙත් හැදෙනව..කට්ටිය තාම හිනා වෙනව..මගෙ ළඟම හිටපු මිතුරිය මට පොතුටික අනික් බාල්දියට දාන්න කියල කිව්ව..මාත් ඉතින් පොතුටික බාල්දියට දාල..අලුතෙන් එකතුවෙන ඒවත් බාල්දියට දාන්න පටන් ගත්ත..උන් උන්ගෙ පොතූ බිමට දානව..මං මගෙ පොතුටික බාලදියට දානව..ඔය අතරෙ ඉතින් ආගිය තොරතුරු කතා, මඩ ගහගන්න ඒව සිද්ද උනා...

විනාඩි පහකින් විතර..එකෙක් අර මං පොතු දාපු බාල්දිය අරගෙන පොතුටික බිමට දැම්ම..කට්ටියට මාර ආතල්..මහා හයියෙන් හිනා වෙනව..මට වහකන්න හිතුනා..මාත් ඉතින් ශේප් එකේ හිනාවෙලා හිටිය..වවුලගෙ ගෙදර ඉන්න ඕනෙ වවුලෙක් විදියටලු..මොනව වුනත් ඒක හොඳ අත්දැකීමක් මට..කොහොමහරි ඉතින් ඊට පස්සෙ අපි කාල බීල..තනිතනියෙන් තම තමන් කාපු බීපුවට බිල ගෙවල..වෙනවෙනම ටිප් එකකුත් තියල එළියට ආව..මෙහෙ සාමාන්‍ය සිරිත ඒකයි..අපිට ඒක දිරවන්නෙ නැතිඋනාට..ඇමරිකන් ක්‍රමය ඒක..

ඇමරිකානුවන් මිත්‍රශීලියි..විනෝද කාමියි..

ඊට පස්සෙ අර මගෙ ළඟම හිටපු මිතුරියට ඕනෙ වුනා ඊයෙම රිලීස් වුන "A-Team" කියන..ඇක්ශන් ෆිල්ම් එක බලන්න..එයා කිව්වම බැහැ කියන්නෙ කොහොමද..ඔන්නෙ ඔහෙ තව ඩොලර් 7නෙ කියල මාත් ගියා..ඒකෙත් ගතියක් තියෙනව..

තව රෙස්ටෝරන්ට් කතා තියෙනව..පස්සෙ වෙලාවක එළියට දාන්නම්...

කොහොමද අයිෆ? ඉන්දියානුවෙක් මගෙන් ඇහුවා...

2010-06-05T23:16:00.000-07:00

මං කැම්පස් එකට යන්නෙ පයින්..විනාඩි දහයක් විතර තමා යන්න තියෙන්නෙ..ඊයෙ දවල් කැම්පස් යනකොට මට ඉන්දියන් පුද්ගලයෙක් හම්බුනා..බැලූ බැල්මටම ඉන්දියාවේ බව කියන්න පුලුවන් තරමක් කාලවර්ණයෙන් යුත් අවුරුදු 50ක විතර කෙනෙක්..පළවෙනි උපාධිය ඉන්දියාවෙන් තමයි අරන් තියෙන්න..පස්සෙ මෙහෙ පුරවැසිභාවය හම්බෙලා..එයාගෙ පුතා කැම්පස් එකේ ඉගෙන ගන්නව කියලා පස්සෙ දැන ගන්න ලැබුනා..

එයා මාව දැක්කාම එයා හිතුවෙ මාත් ඉන්දියාවෙන් කියල..මිනිහා තමිල්නාඩුවලින්..මං කිව්වම මම ලංකාවෙන් කියල..ආහ් අපේ සහෝදර රටෙන්නෙ කියල බොහොම මිත්‍රශීලි හිනාවක් දැම්ම..

එයා මුලින්ම ඇහුවෙ මගෙන් අයිෆ එක ගැන..මට ඒක එච්චර දිරවන්නෙ නැති මාතෘකාවක් නිසා කෙටි උත්තර තමයි මම දුන්නෙ..මිනිහ එතකොට අහනවා..ඇයි ලංකාවෙ වෙන දේවල් දන්නෙ නැද්ද කියල.. මාත් අත හැරියෙ නෑ..මං කිව්ව නළු නිළියො ගොඩාක් අය එන්නෙ නෑ නේද කියල..බච්චන් එන්නෙත් නෑනේද කියල..මිනිහ කියනව..ඔය සම්මන උළෙලක් නිසා තමිල්නාඩුව දෙකඩ වෙන්න දෙන්න ඉන්දියානුවො කොහොමවත් ඉඩක් තියන්නෙ නෑ කියල..ඒ කට හඬේ ලොකු ජාත්‍යාලයක් තිබුනා..මොනව වුනත් කතාව ඇත්ත..ගොඩාක් ඉන්දියානුවන් ගාව තමන්ගෙ රටගැන ලොකු හැඟීමක් තියෙනව..

ලංකාව යුද්දෙන් පස්සෙ කොහොමද කියල ඇහුවම මම කිව්ව දැන් දියුණුවෙමින් පවතිනව කියල..හැබැයි මට ඒක අභිමානයෙන් කියන්න බැරිඋනේ ඇයි කියල මට තාම ප්‍රශ්නයක්..

ඊළඟට ඇහුවෙ ක්‍රිකට් සහ ජයසූරිය ගැන..වෙලාවට ඒ වෙනකොට අපි ඇවිදගෙන එයාට යන්න ඔනෙවෙලා තිබුන බිල්ඩින් එක ගාවටම ඇවිත් තිබුන නිසා මමත් පටස් ගාල සමු දීල මාරු උනා..

Mission නෙමේ Pigeon Impossible..

2010-05-30T20:53:00.000-07:00

ගූගල් එකේ රවුමක් දානකොට නියම ඇනිමේෂන් එකක් හම්බුනා..මේක Mission Impossible නෙමේ..Pigeon Impossible..ඔයාලත් බලලම ඉන්නකො..
විහිළුවක් වගේ පෙනුනට ඒකෙන් ගොඩාක් දේවල් කියව්වෙනව කියලයි මටනම් හිතෙන්නෙ..

වෙන්ඩින් අලුත් වෙලා..

2010-05-26T12:25:00.000-07:00

මං මේ කියන්න යන්නෙ වෙඩින් මැෂින් ගැන එහෙම නෙමේ හොඳේ..වෙන්ඩින් මැෂින් එකක් ගැන..අර සල්ලි දාලා coke, pepsi, tea එහෙම නැත්නම් chocolate, biscuit වගේ ජාති ගන්න පුලුවන් මැෂින්..අන්න ඒකක් ගැන..සාමාන්‍යයෙන් ඒ වලින් ගන්න පුලුවන් වරකට එකයි..

මෙහෙ ඒව හැම තැනම තියෙනව..ගුවන් තොටුපොළේ, බස් නැවතුම් පොළේ,දුම්‍රිය ස්ථානයේ..විශේෂයෙන් මෙහෙ කැම්පස් වල හැම තැනම තියෙනව..තිබහක් ආවම..එහෙම නැත්නම් පොඩි බඩගින්නට..කට්ටිය යන්නෙ ඕකක් හොයගෙන තමයි..සල්ලි දාල, අවශ්‍ය දේට අදාල බොත්තම එබුවාම, යටින් තියෙන කවුලුවෙන් ඒක එනව..වැඩේ ලේසියි..

ඒත් මං දැක්ක පුදුමාකාර වෙන්ඩින් මැෂින් එකක්..ඔයගොල්ලොත් බලන්නකො..හැබැයි මං වෙළඳ නාමයක් ජනප්‍රිය කරන්න හදනව එහෙම නෙමේ..අපේ කැම්පස් එකටත් මේකක් එනකන් තමයි මං බලන් ඉන්නෙ..

දැන් නිවාඩු කාලෙ හින්ද නෑ ඉස්කෝලේ...

2010-05-16T23:25:00.000-07:00

ගිනිගහන මද්දහන

කාශ්ටක මහ පොළව

ඉරි තැලූ මහ පාර

වයෝවෘධ කඳුවැටිය

හුදකලා නිසොල්මන

ඇරඹුනා පමණි තව

ගිම්හාන නිවාඩුව..

රයිස් කුකර් කිරිබත්...

2010-04-15T19:17:00.000-07:00

ජනවාරි පළවෙනිද හදාගන්න බැරිවුන කිරිබත් එක මේ පාර නැකතටම උයාගන්න පුලුවන් උනා..ගිය පාර මලීයි පිස්සයි ගොඩක් උදව් කලා...හැමෝටම ස්තූතියි..

උත්සාහය අත ඇරියෙ නෑ..රයිස් කුකර් එකේමයි ඉව්වෙ..ලංකාවට උදේ උනාට මෙහෙට 13වෙනිද රෑ තමයි නැකත් වෙලාව තිබුනෙ..ලංකාවට නිවාඩු උනාට මෙහෙට නිවාඩු නෑනෙ..කැම්පස් එකේ විභාග, ලෙක්චර්ස්..ඒ විදියටම..14 වෙනිද කරල දෙන්න හෝම්වර්ක් එකකුත් තිබුන නිසා වැඩිවෙලාවක් තිබුනෙ නෑ උයන්න..කිරිබත් එක හරියනකොට ලුනු මිරිසකුත් හදාගත්ත..කෙහෙල් කොල, මිරිස්ගල් මොකුත් නැති උනාට, වැඩි අවුලක් තිබුනෙ නෑ..ලංකාවෙදි අම්ම හැමදාම හත් මාලුවකුත් හදන හින්ද, මාත් ට්‍රයි කලා..ඒකත් ගොඩ දාගත්ත..කොහොමහරි ආහාර අනුභව කරන නැකතට මාත් මෙහෙ ඉඳන් වැඩ ඇල්ලුව..ගෙදරින් පිට හිටපු පළවෙනි අළුත් අවුරුද්ද..හිතට ටිකක් දුකයි තමයි..ඒත් මොනව කරන්නද..කැවුම් කොකිස් නැතත්, මගෙ අවුරුදු මේසෙ ගැන මට ආඩම්බරයි..හැමෝටම සුබ අලුත් අවුරුද්දක් වේවා..!

මේ මොකක්ද මේ..මේකෙන් මොකද කරන්නෙ..

2010-03-13T12:14:00.000-08:00

මෙහෙට ආව මුල් දවස්වල මේක මට මාර ප්‍රශ්නයක්..ගොඩක් lecture hall වල මේ වගේ එකක් බිත්තියෙ හයි කරල තියනව..සමහර ඒවල ජනේලය ළඟ හයි කරල තියෙන නිසා..මං මුලින් හිතුවෙ blind එක අයින් කරන්න හරි, ජනේලෙ අරින්න හරි වෙන්න ඇති කියල..ඒත් සමහර වෙලාවට දොර ළඟත් තියෙන නිසා..මේක මට මාර ප්‍රශ්නයක්..කවුරුත් මේකෙන් වැඩක් ගන්න පාටක් නෑ..

එක දවසක් ලෙක් එකක් අතර මැදදි ගෑනු ළමයෙක් නැගිටල දොර පැත්තට ගියා..lecture එක මැදදි නැගිටල එළියට යන එක මෙහෙ සාමාන්‍ය දෙයක්..callඑකක් ආවම එලියට ගිහින් කතා කරල එනව..බඩගිනි නම් හරි තිබහ නම් හරි එළියෙ තියෙන vending මැෂින් එකකින් මොනවහරි අරන් එනව..lecture එක වෙලාවෙ කන බොන එකත් සුලබ දෙයක්..ගොඩක් ප්‍රොෆෙසර්ල මොකුත් කියන්නෙ නෑ..අර මම කිව්ව ළමය අර ගැජට් එක ළඟ නතර වෙලා..ඒකෙ තියෙන සිදුරට පැන්සල දාල..අර පොල් ගාන මැෂින් එකකින් පොල් ගානව වගේ කරකවනව..මට පට්ට හිනා..ළඟ හිටපු කෙනෙක්ගෙන් අහල බැලුව ශේප් එකේ..ඒක පැන්සල් උල් කරන එකක්ලු..මෙහෙ ළමයි ලියන්නෙ, PhD කරන අය පවා ලියන්නෙ පැන්සලෙන්.. එක නිසාලු හැම lecture hall එකකම pencil sharpner එකක් තියෙන්නෙ..අර මං විස්තර අහපු ළමය අහනව අපේ රටේ ළමයි ලියන්නෙ පැන්සලෙන් නෙමෙයිද කියල..මං කිව්වම හතර වසරෙන් පස්සෙ පෑනෙන් ලියන්නෙ කියල මිනිහ පුදුම වෙලා බලන් ඉන්නව..මෙහෙ විභාගවලටත් ලියන්නෙ පැන්සලෙන්..

ඉස්සර පාවිච්චි කරපු ලී පැන්සල වෙනුවට දැන් mechanical පැන්සල් තමයි ගොඩක් වෙලාවට පාවිච්චි කරන්නෙ..mechanical පැන්සල් කියන්නෙ අර උඩින් එබුවම පැන්සල් කූර දික්වෙන ඒව.. ඒක නිසා තමයි දැන් වැඩිය අර ගැජට් එක පාවිච්චි කරන්නෙ නැත්තෙ..හැම ළමයෙක්ගෙ අතේම.. පැන්සලයි මකන කෑල්ලයි අනිවාර්යෙන්ම දකින්න පුලුවන්..මාත් පැන්සලට මාරු උනා..ඒක හරිම සිම්පල් ප්ලෑන් එකක්..

අපේ රටේ මෙහෙම වුනා නම්..

2010-02-11T19:03:00.000-08:00

අපේ රටේ මෙහෙම වුනා නම්..එක්කෝ ගහම කපල දායි..එහෙමත් නැත්නම් අත්තක් කඩන් වැටිල අනතුරක් වෙනකම් කවුරුත් මොකුත් කරන එකක් නෑ..

සසල හිත

2010-02-06T19:09:00.001-08:00

සති අන්තෙ දිග හැඩයි

ඇය නොදැක දුක වැඩියි

තාම හත හමාරයි

මෙහෙ රෑට සීතලයි..

මැවෙන්නේ ඇගෙ රුවයි

ගෙදර වැඩ එහෙම්මයි

සිත මගේ ඇය ළඟයි

ඇය දන්නවද සැකයි..

දැන් තවත් සීතලයි

හීටරය මදි හැඩයි

උයපුවත් ඉවරායි

ෆ්‍රිජ් එකත් හිස් වගෙයි..

නූඩ්ල්ස් අද හොඳයි

වැය වෙන්නෙ සත තිහයි

වෙලාවත් අඩු වෙන්නෙ

මං කාල නිදියන්නෙ..

Barn Buddy..

2010-01-13T21:33:00.000-08:00

දඩෝරියෙක් ඇත මගෙ වත්තෙත් නමට..

300ක් යනව මුට වේලක් දෙන්ට..

කොයින් දෙක තුනක් මිස එන්නේ නෑ දිනට..

හොරු අඩුවකුත් නෑ වගෙ මූ හිටියාට..

රැග් වෙඩිම

2010-01-11T19:52:00.000-08:00

මේක මං කැම්පස් ගිය මුල් දවස්වල වුනේ..කැම්පස් වල රැග් එක ගැන අහල තිබුන හින්ද යන්න කලින් මාත් ටිකක් බයෙන් හිටියෙ..අපේ ෆැකල්ටි එකේ රැග් නෑ කියල අහල තිබුනට පළවෙනි දවසෙ යනකොට නම් ඇත්තටම මාර බයකින් ගියෙ..

කොහොමහරි ගිහින් ටිකවෙලාවක් යනකොට මගෙ බය නැතිවෙලා ගියා..මෙහෙ උත්තමයො..උත්තමාවියො නෑ..ඉන්නෙ අය්යල අක්කල..ඒගොල්ලොත් හරි සුහදයි..මල්ලියෙ නංගියෙ කියල කතා කරන්නෙ..උඹ බං බොලං ගෑවත්..ඒ හිතේ කහටකින් නෙමේ..

අපේ බැච් එකේ කට්ටිය අඳුන ගන්නයි..කට්ටිය ෆිට් කරන්නයි..ඕනෙ හින්ද... ඒගොල්ලො පොඩි පොඩි ගොන් පාට් කරන්න දෙනව අපට...

සින්දුවක් කියන්න..ඇඩ් එකක් රඟපාන්න...එහෙමත් නැත්නම් මලක් ගිහින් අක්ක කෙනෙක්ට දීල ආදරය ප්‍රකාශ කරන්න..අපිට දුන්න ආතල්ම වැඩක් තමයි වෙඩින් එක..කෙල්ලෙක්වයි කොල්ලෙක්වයි චාරිත්‍රානුකූලව බන්දනව..

දවල් 12 විතර වෙනකොට අපිට තිබුන English කෝස් එක ඉවරයි..අය්යල ඇවිත් ඊට පස්සෙ කට්ටිය කණ්ඩායම් වලට කඩල, එක එක තැන් වලට එක්කන් යනව..අරන් ගිහින් අපිට කැම්පස් එක ගැන කියා දෙනව..ලෙක්චර්ස් වල ඉන්න ඕන හැටි..ප්‍රැක්ටිකල්ස් කරන්න ඕනෙ හැටි..කෝස් වලට රෙජිස්ටර් වෙන හැටි..ඕව කියල දෙන ගමන් වෙනසකටත් එක්ක පොඩි පොඩි ගොන් පාට් කරවනව..කාට හරි සින්දුවක් කියන්න කියනව..තව කට්ටියකට බාර දෙනව ඒක වීඩියෝ කරන්න..ලයිටින් රෙකෝඩින්..මේ හැම එකක්ම කරනව වගේ බොරුවට පෙන්නන්න ඕනෙ..ගොන් පාට් කියන්නෙ ඒකනිසා වෙන්න ඇති..මේව කරනකොට ඉතින් මාර ආතල්..

එක දවසක් මට සෙට් උනේ සොලා අය්යව..එයාගෙ කණ්ඩායමට තමයි මාව සෙට් උනේ..සොලා කියන්න අපිට උඩ බැච් එකේ අය්ය කෙනෙක්..මිනිහ කියන්නෙ, එයා ඇවිදින තෙල් බවුසරයක්ලු..අපිට ඔය එක එක දේවල් කියල දෙන එකට කියන්නෙ "තෙල" බෙදනව කියල..

අපි කට්ටිය 12ක් විතර එක්කගෙන ගියා ගහක් යටට..කට්ටියටම ඉඳගන්න කියල තෙල බෙදන්න ගත්ත..ටිකවෙලාවකින් ඔන්න හැමෝම ආසාවෙන් බලන් ඉන්න ආතල් ටයිම් එක ආව..

මං ඉඳගෙන හිටියෙ ගෑනු ළමයෙක් ළඟ..ඒක අහම්බෙන් වුන දෙයක්..එතන හිටපු ලස්සනම ළමයත් එයා තමයි ඉතින්..එයාගෙ නම නුවනි..නුවනි එයාගෙ යාලුවත් එක්ක ටිකක් පරක්කු වෙලා ආවෙ..මගෙ ළඟ ඉඩ තිබුන නිසා එයා එතන ඉඳ ගන්න ඇති..

සොලා අය්ය කිව්ව අද වෙඩින් එකක් තියනව කියල..අපේ කෙනෙක්ට කිව්ව රන් හුයක් හොයන් එන්න කියල..රන් හුයෙන් දෑඟිලි බැඳලනෙ අත පැන් වත් කරන්නෙ..වීඩියො ටීම් එකත් හරි..ෆොටොග්‍රැෆර් කෙනෙකුයි සහයකයයි තෝරලත් ඉවරයි..ඊළඟට කපුමහත්තය..දැන් අඩු මනමාලයයි මනමාලියි විතරයි..නුවනිව ගත්ත මනමාලිට..එයාත් ලැජ්ජාවෙන් මූන රතුකරගෙන නැගිටල ඉස්සරහට ගියා..මනමාලය මමලු..මඟුලයි..නැගිටල ඉස්සරහට ගියා නෙමේ යැවුනා..දාඩියත් දාගෙන එනව...උගුර කටත් වේලුනා..මනමාලිට වැඩිය මං nervous..

පෝරුවට තිබ්බෙ බෙන්ච් එකක්..ඒක උඩට නැග්ගුව අපි දෙන්නව..60ක් විතර වටවෙලා බලන් ඉන්නව..උඩ බැච්වල අය්යල අක්කල හිටගෙන බලන් ඉන්නව..අපේ උන් ඉඳගෙන බලන් ඉන්නව..පිස්සු හැදෙනව..

කපු මහත්තය රන්හුයෙන් අපි දෙන්නගෙ සුළැඟිලි ගැටගැහුව..රන් හුයට තිබ්බෙ වැල් පොටක්..

ඔන්න දැන් ශ්ලෝක කියන වෙලාව..බන්දන්න කියන ගාථාවක් තියනව..(කැම්පස් එකේ පාවිච්චිකරන්නෙ වෙනම එකක්..)

කපුවට හිටපු කෙනා..මලිත්..ඔය ගාථාව දැනගෙන ඉඳල නෑ..මෙන්න එකපාරටම මලිත කියනව "වණ්ණ ගන්ධ.."
මල් පූජ කරන ගාථාව..අපෙ උනුයි..අය්යල අක්කලයි බඩ පැලෙන්න හිනාවෙනව..අපි දෙන්නටත් හිනා..

ෆයිනල් කරන අය්ය කෙනෙක් ඇවිත්..

"ආ..මල්ලි..උඹට මේ නංගිව පේන්නෙ මලක් වගේද?..පූජා කරන්න හිතුනේ.."

"මල්ලි... උඹ බැහැල මූව බන්දපන්.."

මට පෝරුවෙන් බැහැල..කපුවව බන්දන්න වුනා නුවනිට..හිතට පොඩි දුකක් ආවෙ නැත්තෙත් නෑ..

"නුඹේ අත ගෙන..පෙර සැඳෑවක..උයන් තෙර හිඳ ආදරෙන්..
ගැයූ කුළුඳුල් ප්‍රේම ගීතය..විරහ ගීයක් නොවේවා.."

සාම්ප්‍රදායක ගාථාව කියල මං අත පැන් වත් කළා...ඊට පස්සෙ ඉතින් පෝරුවෙන් බැස්සුව..

යුවති පති දෙපලට හනිමුන් යන්න කියල, අය්යල යන්න ගියා..රැග් වෙඩිම ඉවර වුනේ ඔන්න ඔය විදියට..

මං ලංකාවෙන් එන්න දවස් දෙකකට කලින්.. අලුත් බැච් එකක් ආව..ඒ වෙද්දි ඉස්සර වගේ ගොන් පාට් දෙන්න බැරි වුනත්.. මට තියෙන අමාරුව හින්දම...හොරෙන් බලන් හිටිය..අලුතෙන් එන ළමයි කිට මරල එන නිසා..
ඒ අතර හිටියට කවුරුවත් ඇඳිනුවෙ නෑ..ටිකක් වෙලා බලන් ඉඳලා ආපහු Department එකට එන්න එනකොට..

"මේ..තමුසෙ පොර කියල හිතාගෙනද ඇවිදින්නෙ..කාගෙන් අහලද යන්නෙ..?"

මට මාර ආතල්..මූට මාව මාරු වෙලා..මට හිනා ගියා..

"මොකද යකෝ හිනා වෙන්නෙ..හිනාව කපා ගනිං.."

"අනෙ සොරි සර්..මූට වැරදිලා..මූ ඉතින් ලෙක්චර්ස් යන්නෙ නෑනෙ..සර්ව අඳුනන්නෙ නෑ..වරෙන් වරෙන් බං යන්න..උඹට පිස්සුද?..ඒ අපේ සර් කෙනෙක්.."

කාලය ඉගිල්ලිලා ගිහින්..

එපා වෙලාද? මේක හරියයි සමහරවිට...

2010-01-10T14:39:00.000-08:00

නිවාඩු කාලෙ නිසා මාර කම්මැලියි..මෙහෙ කරන්න ඕනතරම්

දේවල් තිබුනට ඉතින් හැම එකකටම සල්ලි ඉස්සර වෙනවනෙ..
හම්බෙන ගානෙන් රෝල ගෙනියන්නෙ ටිකක් අමාරුවෙන්..

ඉතින් නිවාඩු කාලෙම apartment එකට වෙලා ඉන්නකොට තමයි
ලංකාවෙ අගේ තේරෙන්නෙ..

කරන්න වැඩකුත් නෑ..ෆිල්ම්ස් බලලත් ඇතිවෙලා..

කරන්නම දෙයක් නැති නිසා දැම්ම ගූගල් සර්ච් එකක්..
"What to do when I am bored"
හම්බුනා Bored.com කියල එකක්..ඒකෙ තියෙනව ෆ්ලෑෂ් ගේම්ස්..

"Causality" කියල ගේම් එකක් හම්බුනා..ඒක ටිකක් interesting වගේ නිසා හිතුනා ඒ ගැන ලියන්න..

මේකෙ කරන්න තියෙන්නෙ මේ කළු පාට මිනිස්සු ටික මරල දාන එක..මිනී මරන එක මං අනුමත කරන්නෙ නෑ..ඒත් මේ ගේම් එකෙන් ටිකක් හිතන්න පුරුදු කරනව වගේ කියල මට හිතුන නිසයි මං දාන්න තීරණය කළේ..

සෑම ක්‍රියාවකටම ප්‍රතිඵලයක් තියෙනව..Every cause has an effect..දැනට තියෙන විදිය වෙනස් කළොත්..ඒ වෙනසට අනුව ඊළඟට වෙන්නෙ, කළින් වෙන්න තිබුන දෙයට වඩා වෙනස් දෙයක්..ඒ වෙනස අදාල විදියට කරගත්තොත් දිනුම්..අනිත් එක..එක කළුපාට මිනිහෙක් නැති කරනකොට, ළඟ ඉන්න වෙනත් කළුපාට කෙනෙක් දැක්කොත් පරාදයි..

ගේම් එකේ විස්තරය තියෙන්නෙ මෙන්න මේ විදියට..

Description:

Can you figure out how to kill all of the stickmen?

There are 4 levels to this complex game, and

use your intelligence and mouse!

Click Click Click!!!

හැම තැනම ක්ලික් කර කර හැම විදියකටම කරල බලන්නකො..මට තාම යන්න පුලුවන් වුනේ level 3ට විතරයි..ඔයාල ගියොත් කියන්නකො..

හරියට කළොත් විනාඩි දෙකක්වත් යන්නෙ නෑලු..

To play the game..මෙතනින් යන්න..

අවංක පාර්කින්

2010-01-06T18:52:00.000-08:00

අවංක පාර්කින් කිව්වම බලයි පාර්කින් වලට මොන අවංකකමක්ද කියල..

ඒත් මෙහෙදි නම් රියදුරන් හරිම අවංකයි..ටවුන් එකේ ගොඩක් තැන් වල පාර අයිනෙ වාහන පාර්ක් කරන්න තැන් හදල තියනව..පේමන්ට් එක අයිනෙ පොඩි කණුත් හිටවල තියනව..කණුව උඩ පොඩි ගැජමැටික් එකකුත් අටවල තියනව..

මෙහෙ ආව මුල් දවස් වල මට මාර ප්‍රශ්නයක්..මොකටද ඕක තියෙන්නෙ කියල..ටික දවසකින් තමයි දැන ගත්තෙ සිද්ධිය..

පේමන්ට් එක ළඟ වාහනය නවත්තල..ඒ කණුව උඩ තියෙන ගැජමැටික් එකට සල්ලි දාන්න ඕනෙ..ඒකෙ ගහල තියෙනව කොච්චර සල්ලි දාන්න ඕනෙද කියල.. සාමාන්‍යයෙන් පැයකට ඩොලර් එකක් විතර..සල්ලි දැම්මම එතන නවත්තල තියන්න පුලුවන් වෙලාව පෙන්නනව.. මේව ගොඩාක් වෙලාවට වැඩ කරන්නෙ හිරු එළිය විද්‍යුත් ශක්තිය බවට හරවල..තේරෙන සිංහලෙන් කිව්වොත් solar panel එකක් තියෙනව..

මං ඒකයි කිව්වෙ මෙහෙ මිනිස්සු අවංකයි කියල..ඒගොල්ලො වාහනෙන් බැහැල සල්ලි දාලම තමයි යන්නෙ..

ලංකාවෙත් මේව දාන්නයි තිබුනෙ..හිතා ගන්න පුලුවන්නෙ එහෙම තිබුනනම් වෙන දේ..

චැට් ගර්ල් 3 ( අවසාන කොටස )

2010-01-05T08:31:00.000-08:00

චැට් ගර්ල් 1 මෙතනින් කියවන්න
චැට් ගර්ල් 2 මෙතනින් කියවන්න

ඊට පස්සෙ දවසෙ උදෙ වරුවෙම මං කොච්චර උත්සාහ ගත්තත් එයාගෙන් SMS වලට රිප්ලයි එකක් වත් කෝල් එකක්වත් ආවෙ නෑ..

දවල් 2ට විතර කොයින් බොක්ස් එකකින් කෝල් එකක් එනව..

"අනේ සොරි සමීර..මගෙ ක්‍රෙඩිට්ස් ඉවර වෙලා..ඒකයි කතා කරන්න බැරිඋනේ..උදේ නැගිටිනකොටත් පරක්කු වෙලා..කෙලින්ම වෝඩ් එකට ආවා..දැනුයි ට්‍රේනින් ඉවර වුනේ.."

"ඇති යාන්තම්..දැනුයි මට ලේ ටිකක් ඉනුවෙ"

දවස් දෙක තුනකින් සෙමිස්ටර් එක පටන් ගත්තා.. මගෙ අන්තිම සෙමිස්ටර් එක..එදා උදේ නිසංසලා මගෙන් ඇහුව..පොතක් ගන්න තියනවා..බොරැල්ලට යන්න එනවද එයත් එක්ක කියල..මට ලෙක්චර්ස් නිසා මං කිව්ව හවස තමා මට ෆ්‍රී වෙන්නෙ කියලා..

"කමක් නෑ සමීර..මං ගිහින් ගන්නම්"

හවස ලෙක්චර්ස් ඉවර වෙලා අහල බැලුව පොත ගත්තද කියල..

"මට උන සමීර..ඒක නිසා ගියේ නෑ.."

මගෙ හිතටත් මොකක්දෝ වගේ..මෙහෙම ගියොත් මටත් උන ගැනෙයි වගේ..

"මං එන්නද හොස්ටල් එක ළඟට..ඔයාව බලන්න.."
"එහෙනම් පුන්චි බොරැල්ලට එන්න..මං බෝගහ ඉස්සරහ ඉන්නව..අපි පොත ගන්න යමු.."

"එතකොට උන"

"මට උන නෑ.. ;) "

මං හිතන විදියට ඒක තමයි මං දැනුවත්ව 64න් එකකට අහුවෙච්ච පළවෙනි පාර..

පුන්චි බොරැල්ලෙ ඉඳන් බොරැල්ලට අපි පයින්ම ගියා..පෙරේරා ඇන්ඩ් සන්ස් වලින් නිසංසලා සොෆ්ට් ඩ්‍රින්ක් දෙකක් ගත්ත..

එයාගෙ යාලුව ගොඩගිය හැටි..ටිකක් මිටි එයාගෙ බැට්ච් එකේම මෙඩ්ඩෙක් එයාගෙන් අහපු හැටි..එයා shape එකේ ලිස්සල ගිය හැටි..එයාගෙ අක්කට වෙන්ට මස්සිනාව සෙට් වුන හැටි..හරි ලස්සනට මට චිත්‍රයක් වගේ පේන්න ගත්ත..තාම ඉන්නෙ පෙරේරගෙ වහලෙ යට කියල මතක් උනේ ගොඩාක් වෙලා ගියාට පස්සෙ..

ඊට පස්සෙ අපි ගියෙ විජිත යාපා එකට..එයා එක්ක මං පාරෙ යනකොට වටේපිටේ ඉන්න සෙනඟ මං දිහා බලන්නෙ හරියට මං බාල අපරාධයක් කරන්න යනව වගේ..එයා ඒතරම්ම පොඩී..හරියට ඉස්කෝලෙ යන ළමයෙක් වගේ..සරසවියෙන් ගත්තා Gyn and Obs පොතක්..මට නම් ඒකෙ තිබුන මෙලෝ දෙයක් තේරුනේ නෑ..

ආපහු පුන්චි බොරැල්ලට පයින්..එතනින් මරදාන හරහා ගම්පහට..පහුවෙනිදා උදේ යාලුවන්ට දාහක් උත්තර..

"කොහෙද ඊයෙ එක පාරටම අතුරුදහන් උනේ.."
"යාලුවෙක්ට පොතක් අරන්දෙන්න ගියා.."

"මං දැක්ක පොඩි කෙල්ලෙක් එක්ක බොරැල්ලෙදි.."
"එයා මගෙ යාලුවෙක් විතරයි.."
"හරි හරි බලමුකෝ..අපිත් ඉන්නවනෙ.."

මට නිසංසලා ගැන තිබුනේ අනුකම්පාවක්..මොන හේතුවක් හින්දද මං දන්නෙ නෑ..එයා ගැන මට ආදරයක් ඇතිවුනේම නෑ..ඒ වුනාට එයා ඊට වඩා දෙයක් බලාපොරොත්තු වුනා කියල මට තේරිලා තිබුනා..

එයාට මාව හැමදාම බලන්න ඕනෙවුනා..රෑ 1-2 වෙනකම් චැට් කරන්න ඕනෙ වුනා..සමහර දාට එයාට නින්ද යනකම්..

ඒ දවස්වල මං ෆයිනල් ප්‍රොජෙක්ට් එකට හිර වෙලා හිටියෙ....මාස දෙකයි තිබුනෙ ඉවර කරන්න..ඒක නිසා වැඩ ගොඩ ගැහිල තිබුනෙ..අනික මගෙ සුපර්වයිසර් හම්බ වෙන්න තිබුනෙත් හවස 5ට විතර..ඒක නිසා මට නිසංසලාව හම්බෙන්න කොහොමත් වෙලාවක් තිබුනෙ නෑ..මං හිතුව එයා මාව තේරුම් ගනී කියල..ඒත් එහෙම වුනේ නෑ..

සමහර වෙලාවට එයා මට තදින් කිව්ව ඇවිත් හම්බවෙන්න කියල..කොහොමත් එයාගෙ සමහර වැඩ ගැන මට පැහැදීමක් තිබුනෙම නෑ..එයාව මට ගැළපෙන්නෙ නැති බව තේරිලා තිබුනත් එයාගෙ හිතේ ඇතිවෙන හැඟීමට නිසි වටිනාකමක් වෙන කෙනෙක්ගෙන් හරි ලැබෙන්න ඕන කියන මතය මට තිබුනා..

ආදරය කියන්නෙ අන්‍යොන්‍ය අවබෝධය කියලයි මං විස්වාස කරන්නෙ....මට කවදාවත් ඒකාධිපති පාලනයක යටත් වැසියෙක් වෙන්න ඕන නැහැ..අනිත් එක exam මූඩ් ෆික්ස් කර ගන්න ගිහින් මට කබලෙන් ලිපට වැටෙන්න ඕනෙ වෙලා තිබුනෙත් නෑ..
අන්තිමට මට තීරණයක් ගන්න වුනා..මගේ පැත්තෙන්..

"නිසංසලා තරහ වෙන්න එපා මෙහෙම කිව්වට...."

"මට ඔලුව කැක්කුමයි සමීර..මට මගෙ පාඩුවෙ ඉන්න දෙන්න..ඔයාල ඔක්කොම එකයි.."

ඇරඹුමම කඳුලක් වෙලා..
මා බලා ඉද්දී ඒ දිහා..
ආ දුරත් දුර වැඩි නිසා..
අවසානයට පෙර ඈ ගියා..

මේක කියවනකොට කාටහරි හිතෙන්න පුලුවන් මං selfish කියල..ඒත් ඒ වෙලාවෙ හැටියට මට වෙන කරන්න දෙයක් තිබුනෙ නෑ...

එයාට ඕනෙ වෙලා තිබුනේ ENT (උගුර, කන, නාසය පිලිබඳ) ස්පෙෂලිස්ට් කෙනෙක් වෙන්න..එයාට කොහොමත් ඒක කරන්න පුලුවන්..ළඟදිම එයා පාස් අවුට් වෙනව..

සමහරවිට අර "මතක මන්දිර - චංචලා" සින්දුවෙ වීඩියෝ එකට ආසන්න විදියකට කවදාහරි.. කොහේදි හරි.. අපි ආයෙත් මුන ගැහෙයි..ජීවිතය කියන්නෙ මහ අමුතු දෙයක්..ඒක තේරුම් ගන්න එකට තමයි මං හිතන විදියට අපි ජීවත් වෙනව කියල කියන්නෙ..

චැට් ගර්ල් 2

2010-01-04T07:54:00.000-08:00

චැට් ගර්ල් 1 මෙතනින් කියවන්න. .

කෝල් එකක් ඇවිත් ඇහැරිලා බලනකොට වෙලාව උදේ 8ත් පහුවෙලා..නිසංසලාගෙන් missed call 3ක් තිබුනා..පළවෙනි එක උදේ 5ට..SMS එකකුත් තිබුන..

"මං උදේම Gyn and Obs පාඩම් කලා..කම්මැලිය තාම නිදි ඇති.."

මෙඩ්ඩන්ගෙ "වවුල්" ජීවිත..

Gyn and Obs කියන්නෙ ප්‍රසව හා නාරිවේදයට කියල පස්සෙ අහල දැන ගත්ත..එයාට ඊලඟ ට්‍රේනින් එක කාසල් එකේ ලු..ඒක නිසා..ඒව බැලුවලු..

මං Good Morning කියල SMS කලා.. එයා උදේට කන්න යන්නෙ..මටත් කන්න කිවව..

"මට තව ටිකක් තියනව කියවන්න..ඔයත් මොනව හරි පාඩම් කරන්න.."

ස්ටඩිලීව් එකේ මොන පාඩම්ද..ඒත් මං "එළ කිරි.." කියල යැව්ව..

"වැඩිය එළකිරි බොන්න එපා..සෙම වැඩිවෙයි.. :P "

උදේ වරුව මං කලේ මනෝ ගහන එක..ජීවිතේට මට කවුරුත් ඔච්චර ළං වෙලා තිබුනේ නෑ.. දවල් 2ට විතර SMS එකක් ආවා..

"මට බඩගිනියි..මං කන්නයි යන්නෙ..ඔයත් කන්න.."

"මං කාල දැන් පැයක් විතර.."

"ඔයා හරි නරකයි..මටත් නොකියම කාල..මං ඔයත් එක්ක තරහයි.."

ඉතින් දෙය්යනේ මෙච්චර දවසක් මං කෑවෙ කාටවත් කියලද?

යාන්තම් SMS 5ක් විතර ගහල ශේප් කරගත්තෙ..

ඇති යාන්තම මූඩ් එක ෆික්ස්.. කෙල්ලෙක් එක්ක කතා කරන්න ගියාම ලොක් උනාට.. SMS යවල දෙයක් කරගන්න පුලුවන් කියල තේරුනේ එදා...

එයා කන්න කැමති දේවල්..කැමතිම පාට..කැමතිම ඇඳුම..කැමතිම හින්දි ෆිල්ම් ගැන..කැමතිම නළුවා..උයන්න දන්න දේවල් ගැන..

පිස්සු හැදෙනව..

ඇත්තටම මෙඩ්ඩියො මෙච්චර ආතල් එකේ ඉන්නෙ කියල මං පොඩ්ඩක්වත් හිතුවෙ නෑ.. මං හිතුවෙ පොත්ගුල්ලො වගේ පොත්ටිකයි, මිනී ඇටකටු ටිකයි බදාගෙන ඉන්න ජාතියක් කියල..

නිසංසලා පැය කීපයක් ඇතුලත මට මෙඩ්ඩියන් ගැන අළුතෙන් හිතන්න යමක් ඉතිරි කලා..

මං කැම්පස් එකට ගියෙ කෝච්චියෙ..ගෙදර ඉඳන් ස්ටේෂන් එකට ගියෙ ෆුටාර්(foot cycle) එකේ..පැච් එකක් ගිහින් තිබුන හින්දා ඉරිද උදේම මං ගම්පහට ගියා..පැච් එකක් දාන්න ගම්පහටම යන්න ඕනෙ නැති උනාට.. ෆෝන් එකේ ක්‍රෙඩිට් ඉවර වෙන්නත් ළඟ හින්ද ටවුන් එකටම ගියා..අළුත් අවුරුද්දට හම්බ වෙලා තිබුන සල්ලි වගයකට වගකියන්නත් වුනා..

ගම්පහ ගිහින් එන අතර මගදි මිස් කෝල් එකකුත් එක්ක SMS එකක් ආවා..

"සමීර.. මට ඔයාගෙ කට හඬ අහන්න ඕනෙ..ඒවුනාට කෝල් කරන්න එපා..වොයිස් මේල් එකක් එවන්න..මගෙ නම්බර් එක ඉස්සරහට * දාල ඩයල් කරන්න..එතකොට වොයිස් මේල් එකට යයි.."

මීට කලින් ගෑනු ළමයි එක්ක කතා කරල තිබුනට ඒ එක්කො ගානක් ගැන..නැත්නම් assignment එකක් ගැන..

ප්‍රේම කතා කර තිබුනේම නැත...

වොයිස් ටෙස්ට් එකට මොනව කියන්නද කියල හිතහිත ෆුටාර් එක තල්ලු කරන් කන්දක් බඩගෑව..වෙනදට ගියර් එකක් දාල පාගන කන්දම තමයි..අද කන්ද උස ගිහින්ද මන්ද..

"හලෝ නිසංසලා..ඉතින් කොහොමද..මං මේ ගෙදර යන ගමන්.."

"ඔයාට ලස්සන කටහඬක් තියනව.."

එයාගෙ රිප්ල්යි එකත් වොයිස් මේල් එකක්..

එයාගෙ කට හඬ ඇත්තටම ලස්සනයි..

සෙනසුරාදයි ඉරිදයි දවස් දෙකේ SMS 200ක් විතර මං යවල තිබුනා..ඒ පැත්තෙනුත් ඊට සමාන ගානක්..

ඉරිදා රෑ වෙද්දි එයාට ඕනෙ වුනා මගේ ෆොටෝ එකක් බලන්න..GPR‍S වලින් එවන්නලු මගෙ ෆොටෝ එකක්..මගෙ දුප්පත් නොකියා 1100i එකට මොන GPR‍S ද?

"එහෙනම් මාව බලන්න එන්න.."

"tel me a place n a tym.."

ගොඩාක් වෙලාවට එයා SMS කලේ English වලින්..ඉඳලාමත් තමයි සින්ග්ලිශ් පාවිච්චි කලේ..

මෙඩ්ඩියෙක් නෙ ..

එයාට තව සති දෙකකින් විතර exam කියල කලින් අහල තිබුන මතකයට මං කිව්වා අපි exam එකෙන් පස්සෙ හම්බවෙමු කියල..හම්බ වෙනවනම් exam එකට ඉස්සෙල්ල..exam එකෙන් පස්සෙ නම් එයා ගෙදර යනව කියල කිව්ව..මෙඩ්ඩො හැමදාම ටච් එකේ ඉන්න නිසා අපි වගේ exam වලට බය නෑ වගේ..

සඳුදම එයාට මාව බලන්න ඕනෙ වුනා..මේ වෙනකම් එයා මෙඩිකල් ෆැකල්ටි එකේ කියල කිව්ව මිසක් එයාගෙ කැම්පස් එකයි බැච් එකයි කියල තිබුනෙ නෑ..එයා මට පැරලල් බැච් එකෙ අපේ කැම්පස් එකේම කියල කියන ගමන්ම එයා කිව්වෙ "අනේ මං ගැන ඔයගෙ යාලුවන්ගෙන් නම් අහන්න එපා..ඇවිත්ම බලන්න..ප්ලීස්.." කියල..

අපේ කැම්පස් එකේ අපේ වයසෙ මෙඩ්ඩියක් ගැන දැන ගන්න එක ලොකු ගේමක් නෙමේ කියල එයා දන්න නිසා වෙන්න ඇති එහෙම කියන්න ඇත්තෙ..

මාත් ඉතින් කිව්ව විදියටම පහුවෙනිදා දවල් 12.30ට ටවුන් හෝල් වල ODEL එක ඉස්සරහට ගියා..වැකේෂන් එකේ ඇයි කැම්පස් යන්නෙ කියල වෙනදට අම්මා ඇහුවට, අදනම් ඇහුවෙ නෑ..ෆෝන් එක අතේම තියාගෙන ඉන්නකොට..,තනියෙන් හිනා වෙනකොට..රෑ නිදිමරල උදේට නැගිටින්න පරක්කු වෙනකොට..අම්මට සමහරවිට තේරිල තියෙන්න ඇති මගෙ මොකක් හරි වෙනසක්..

ආපහු ගෙදර ආවම හැම දේම කියනව කියල අම්ම දන්නව..

උදේ 10ට විතර SMS එකක් එනවා..එයා මේ ගමන එන්නෙ මාව විස්වාස කරලයි..මෙහෙම වෙනකාවවත් හම්බෙන්න ගිහින් නෑ..අඳුනන කවුරුහරි දකියි කියල බයයි..ඒත් ඔයා හොඳ කෙනෙක් වගේ පේන්නෙ..ඒක නිසා එනව..

කියන්නා කෙසේ කීවත් අසන්නා සිහි බුද්ධියෙන් අහන්න ඕනෙලු..ඒක නිසා දෙවෙනි වාක්‍ය ගැන හිතුවෙ නැති උනාට පළවෙනි වාක්‍යයේ බර ටිකක් ඔලුවට දැනුනා..

මං ගෑනු ළමයෙක් හම්බවෙන්න යන පළවෙනි දවස..ඒත් මං ගියෙ වෙනද කැම්පස් යන dress code එකෙන්මයි..ඩෙනිමයි ටී ෂර්ට් එකයි බාට දෙකයි..වෙලාව 12.30යි..ODEL එක ඉස්සරහා 120 බස් නවත්තන පැත්තෙ ගේට් එක ළඟට වෙලා ඉන්නකොට SMS එකක් ආවා..

"ඔය නිල් පාට ටී ෂර්ට් එකක් ඇඳන් ඉන්නෙ ඔයාද..?"

එයා රෝසපාට සායකුයි ක්‍රීම්පාට ටී ෂර්ට් එකකුයි ඇඳලා ඉන්නව කියලත් කියල තිබුන..

SMS තුන්සිය ගානකට පස්සෙ අපි හම්බුනේ ඔන්න ඔය විදියට..නිසංසලා කලින් කියල තිබුනා එයා හරි පොඩියි..හරියට O\L කරන ඉස්කෝලෙ යන ළමයෙක් විතර ඇති කියල..කිව්ව වගේම හුරුබුහුටි චාම් පාරබ්ල් ගැහැනු ළමයෙක් ඇවිත් මාත් එක්ක කතා කලා..

"ගෙදර ගිහින් හරියට උස මැන ගන්න..ඔයා 5යි 8ක් තියා 5යි 6ක් වත් උස නෑනෙ.." හිනාවෙවී මුලින්ම නිසංසලා කිව්වෙ ඔන්න ඔය වචන ටික.." මං දැනගෙන හිටියෙ නෑනෙ මෙඩිකල් ස්ටුඩෙන්ට්ස්ලට ඇහෙන් උස මනින්න පුලුවන් කියල.."

"බොරු නෙමෙයි ඇත්තටම කියන්නෙ..ඔයාගෙ ටේප් එකේ වැරැද්දක් ඇති.."

මං ඉතින් ඔලුව වැනුව..මගෙ උස ගැන මට ෂුවර් උනාට සමහර වෙලාවට නිශ්ශබ්දතාවය හොඳම උත්තරේ ලු..

පාර පැනල අපි ගියා පාර්ක් එක පැත්තට..මට කොහොමත් නිසංසලා එක්ක පාර්ක් එකට යන්න ඕනෙ වුනේ නෑ..එයා කිව්වා ඕනෙ තැනකට යමු..හැබැයි අක්ක දකින්නැති තැනකට කියලා..මට පාර්ක් එකට වැඩිය පුරුදු පබ්ලික් ලයිබ්‍රි එක නිසා අපි ගියෙ එතෙන්ට..කැන්ටීන් එක පිරිල හිටිය.. වෙන යන්න තැනක් නැති නිසා අපි ගියා කැම්පස් එකේ ආට්ස් ෆැකල්ටි එකට.. යෙලෝ ටේබල්ස් වලට..

"මං හිතාගෙන හිටියෙ ටයි එකකුත් දාගෙන එයි කියල.." බාට දෙකක් දාගෙන හිටපු මට එපා වුනා..

අපි ගොඩාක් වෙලා කතාකර කර හිටිය..එයා උයන්න දන්න කෑම ගැන..අක්ක ඩ්‍රයිවින් පුරුදු වෙන්න ගිහින් ගේට්ටු කනුව කඩපු හැටි..හොස්පිට්ල් ට්‍රේනින් එකේදි වෙච්ච දේවල්... මාරාන්තික ලෙඩක් තියෙන කෙනෙක්ගෙ පවුලෙ අයට.. ඒක සංවේදී විදියට.. පරිස්සමින් කියන්න පුරුදු වුනු හැටි..ඒකට කියන නමකුත් කිව්වා..මොකක්ද මන්ද ප්‍රොටෝකෝල් එකක් කියල..

එයා කතා කලේ බාගෙට බාගයක් මෙඩිකල් ටර්ම්ස් වලින්..මගෙ දිහා හොඳට බලල කිව්ව ඔයාට නම් පේන විදියට ලෙඩක් නෑවගේ..

මාවත් වාට්ටුවෙ ලෙඩෙක් වගේ පෙනුනද දන්නෙ නෑ..

මට තිබුන ලොකුම (මානසික)ලෙඩේ කොණ්ඩෙ යන එක..

"හිස් හොරි නම් නෑ..විටමින් E කරල් දෙකක් අරගෙන හැමදාම ඔලුවෙ ගාන්න..එතකොට හරියයි"

එයා මට විටමින් E ගාන්න කිව්ව..අපේ ප්‍රථම හමුවීම හරියට ස්පෙශලිස්ට් කෙනෙක් චැනල් කලා වගේ.. රෑ වේගෙන ආව නිසා මං එයාව හොස්ටල් එක ළඟට ගෙනත් දාල ගෙදර ආව..මං ගෙදර යන්නෙ කෝච්චියෙන් නිසා පැයක් විතර යනව මට ගෙදර යන්න..ගම්පහට යන්නත් එපැයි..ඒ අතරතුර SMS එකක් ආව..

"මට ඔළුව කැක්කුමයි.."

මං ඉතින් මෙඩ්ඩිට බේත් ගැන කියන්න ඕනෙ නෑනෙ..ඒත් මං කිව්ව නිකමට වගේ අර සචිනි ඔළුව කැක්කුමට බොන පෙති දෙකක් බොන්න කියල..

"බේත් බීල මේක හරියන්නෙ නෑ සමීර..ඔයාට ඕව තේරෙන්නෙ නෑ.."

ඊට පස්සෙ දවසෙ උදෙ වරුවෙම මං කොච්චර උත්සාහ ගත්තත් එයාගෙන් SMS වලට රිප්ලයි එකක් වත් කෝල් එකක්වත් ආවෙ නෑ..

******දිග වැඩී වගේ..ඉතිරි ටික පස්සෙ දාන්නම්...

චැට් ගර්ල් 1

2010-01-03T11:15:00.000-08:00

මේක මම කැම්පස් එකේ හතරවෙනි අවුරුද්දෙ ඉන්න කාලෙ වෙච්ච සිද්දියක් ..පළවෙනි semester exam ඉවර වෙලා වෙනද වගෙම අපිට සති දෙකක නිවාඩුවක් හම්බුනා..exam එක හිතපු තරම් හොඳට කරගන්න බැරිවුන නිසා මං ටිකක් අවුලෙන් හිටියෙ..ඒ දවස්වල මට තිබුනෙ mobitel smart5 එකක්..මං නිකමට වගෙ ඒකෙ තියෙනෙ chat room එකට log වුනා..

chat room එකට ගිය මුල් වතාව නිසා එතන වෙන්නෙ මොනවද කියල වැඩිය තෙරුමක් තිබුනෙ නෑ.. මං දැක්ක සමහරු දාල තියනවා "I am a student..Like to have a cool chat with a girl" කියලා..මටත් ඉතින් නිකන් ඉන්න බැරි කමට දැම්ම ඒ වගේම message එකක් මගෙ number එකත් එක්ක..

ටික වෙලාවක් ගියා..ඒකෙ ඉන්න අය තම තමන්ගෙ ලෝක වල..මගේ message එකට කිසිම reply එකක් නෑ..විනාඩි 45ක් විතර ගියා..කිසිම ප්‍රතිචාරයක් නෑ..idle නිසා auto sign out වුනා..අපිට කොයින්ද බූල් බල්ලො..

මට ඊට පස්සේ ඒක අමතක වෙලා තිබුනෙ..ආයෙත් මතක් වුනේ රෑ නිදා ගන්න ගිය වෙලාවෙ.. රුපියල් දෙක ගැන හිතන්නෙ නැතිව මම දැම්ම ආපහු message එකක්.. නම්බර් එක දාන්න මං අමතක කලේ නෑ..chat රූම වල ගොඩාක් වෙලාවට කෙල්ලන්ගෙ නම් වලින් කොල්ලො චැට් කරල fun ගන්නව කියල මං අහල තිබුන..ඒත් නම්බර් එක දාන්න කියලමයි මගේ හිත කිව්වේ..ඒත් මං හිතුවේ නෑ කවුරුත් ඩිරෙක්ට් කන්ටැක්ට් කරයි කියලා..විනාඩි 5කින් විතර මට mobitel number එකකින් SMS එකක් ආවා..

ඒකේ තිබුනෙ මගෙ විස්තර දැන ගන්න කැමතියි කියල..මං දවල් දාපු message එකත් එයා දැකල තිබුන..මාත් ඉතින් කොල්ලෙක් වුනත් කමක් නෑ කියල හිත හදාගෙන විස්තර ටිකක් කියල එයාගෙත් විස්තර අහල reply එකක් දැම්ම..chat room එකට රුපියල් 2ක් වුනාට M to M රුපියල නිසා පර්ස් එකටත් වාසියි..මොකද රීලෝඩ් එකක් දාන්නෙත් අම්මගෙන් සල්ලි ඉල්ලගෙන නිසා ඒ දවස්වල message එකක් යවන්න කලින් දෙතුන් පාරක් හිතන්න වුනා..

දෙවෙනි message එක ආව..ඒකෙන් කියවුනේ එයා කැම්පස් යන ගෑනු ළමයෙක්..chat යාලුවෙක් විදියට මාත් එක්ක chat කරන්න කැමතියි කියල..මටත් ඉතින් මූඩ් අවුල් වෙලා ඉන්න එකේ කවුරු වුනාම මොකද? එයාගෙ නම නිසංසලා..ඉන්නෙ කළුතර..හොස්ටල් එකේ නැවතිලා කැම්පස් යනව කිව්වා..මේ දවස් වල එයාට පාලුයි කිව්වා..මොකද කියල ඇහුවාම හේතුව කිව්වෙත් නෑ.. ඔය විදියට messages 5ක් විතර එහෙට මෙහෙට ගියා.. රුපියල් 100ක රීලෝඩ් එකක් දැම්මෙ එදා දවල් නිසා මගෙ හිතටත් ටිකක් අවුල් වගේ..කමක් නෑ ඉතින්..එහා පැත්තෙන් රිප්ලයි කරන කෙනාට ඇත්තටම පාලු ඇති..සමහරවිට මොකක් හරි ප්‍රශ්නයක් ඇති..එක නිසා වෙන්න ඇති පාළු කියල මගෙ හිත කිව්ව..මට එක පාරටම මතක් වුනා M‍obitel My Best Friend..දැන් ඉතින් සත 50යි..

සාමාන්‍යයෙන් මොන exam එකක් තිබුනත් මං රෑ 9 වෙන කොට නිදා ගන්නවා.. මං උදේ 5.30ට විතර (ඒ දවස්වල ) නැගිටිනවා..මට පැය 8ක් නින්දක් අනිවා ඕනෙ..නැත්නම් පහුවෙනිදට මෝල්..chat කරන ගමන් ඔය කතාවත් එහා පැත්තට කියල අරින්න අමතක කලේ නෑ..ඊලඟට ආව රිප්ල්යි එකේ තිබුනේ මට "insomnia" තියනවා කියල..ජීවිතේට අහල නැති වුනත් මට හිතුන මේ කියන්නෙ ලෙඩක් ගැන වෙන්න ඕනෙ කියල..අහල බැලුවම කිව්ව වැඩියෙන් නින්ද යන අයට තියෙන ලෙඩක් කියල..

මෙච්චර වෙලා වහගෙන හිටිය බළලා මල්ලෙන් එලියට පැන්න.. කියන්න බෑ කිය කියා හිටපු එයාගෙ ෆැකල්ටි එක මෙඩිසින් නේද කියල ඇහුවම..ඔව් කිව්වා..

අපරාදෙ මං SMS කීයක් ගැහුවද ෆැකල්ටි එක අහගන්න..මෙඩ්ඩියො කොහොමත් ගනන් කියල මං අහල තිබුනාට දැන් තමා හරියටම දන්නෙ..Z score එකත් උඩනෙ..තව SMS දෙක තුනක් යනකොට මෙන්න හෝල් සේල් විස්තර එනව..එයා මේ දවස්වල General Hospital එකේ ට්‍රේනින්ලු..හොඳම යාලුව ළඟදි ගොඩ ගියාලු..(කැම්පස් භාෂාවෙන් කෙල්ලෙක් ගොඩ ගියා කියන්නෙ කොල්ලෙක් සෙට් වුනා කියන එකට ) අක්කටත් ප්‍රොපොසල් එකක් හරි ගියාලූ..එයාට ඒක නිසා පාළුයිලු..මේ වෙනකොට මගේ විස්තර ඔක්කොම එය මගෙන් අහගෙන ඉවරයි..

"මට හරි මහන්සී..නිදා ගන්න යනව.. අද මං ඔයාව රෑ 1 වෙනකම් තියාගත්ත.."

එතකොටයි දන්නෙ වෙලාව එකත් පහුවෙලා කියල..

කෝල් එකක් ඇවිත් ඇහැරිලා බලනකොට වෙලාව උදේ 8ත් පහුවෙලා..නිසංසලාගෙන් missed call 3ක් තිබුනා..

************ඉතිරි ටික පස්සෙ ලියන්නම්

අයිස් ටී

2010-01-02T14:38:00.001-08:00

නිවාඩු කාලෙ හින්ද මාර කම්මැලියි.. වෙනසකටත් එක්ක මෙහෙ යාලුවො කීප දෙනෙක් එක්ක සෙට් වෙලා මෙක්සිකන් රෙස්ටෝරන්ට් එකකට ගියා.. දවල්ට කන වෙලාව නිසා ඒක පිරෙන්න සෙනඟ.. මෙක්සිකන්.. ඇමෙරිකන්.. හැමෝම හිටිය එතන..

ලස්සන මෙක්සිකන් කෙල්ලෙක් ඇවිත් අපිට ඉඳගන්න ටේබල් එක්ක සෙට් කරල දුන්න..

"බොන්නෙ මොනවද..? අයිස්ඩ් ටී..? "

"ඔව් ඒව හොඳයි.."

මාත් එක්ක ගිය මෙහෙ උන් ඒව හොඳයි කිව්ව හින්ද මාත් ඉතින් ඔළුව වැනුව..

මෙනු කාඩ් එක බැලුවට කිසිම කෑමක් අඳුනන් නෑ..කලින් කාල තිබුන ජාතියකට තිබුනෙ "TACO" විතරයි.. TACO කියන්නෙ ලංකාවෙදි අපි දන්න රොටියිවලයි තෝසෙවලයි අතරමැදි අවස්ථාවක්.. තිරිඟු පිටි වලින් හදපුවත් තියනව..ඔන්නම් බඩ ඉරිඟු පිටි වලින් හදපුවත් තියන්ව..මැදට එක එක ජාති දාල පෑන් කේක් වගේ රෝල් කරල තමයි දෙන්නෙ..

යන්තම් මෙහෙ යාලුවෙක්ගෙ පිහිටෙන් මොකක්දෝ කෑමක් ඕඩ කලා..නමනම් මතක නෑ..

වීදුරුවකට දුඹුරු පාට වතුර ජාතියකුයි අයිස් කියුබ් ටිකකුයි දාල..දෙහි කෑල්ලක් උඩින් ගහල..බටයකුත් දාල ගෙනත් තිබ්බ..

හැමෝටම හම්බුනායින් පස්සෙ කට්ටිය කිසිගානක් නැතිව බොන හින්ද මාත් බොන්න ගත්ත..

එළම කිරි..

තේ කහට වලට අයිස් දාල.. මෙලෝ රහක් නෑ.. අරුන් ටික නම් කිසි ගානක් නැතිව ඇදල අරිනව..

අයිස්(ඩ්) ටී කියන්නෙ ඒවටලු..

රයිස් කුකර් කිරිබත්..

2010-01-01T17:13:00.000-08:00

හැමෝටම ජයග්‍රාහී නව වසරක් වේවා කියල ප්‍රාර්ථනා කරනව..ලංකාවට නව වසර උදා වෙලා පැය 11.30කට විතර පස්සෙ තමයි ටෙක්සාස් වල මං ඉන්න හරියට නව වසර උදා වුනේ..ගෙදරින් ඈත්ව ගතකරන පළවෙනි ජනේරුව..මං ඉන්නෙ ලංකාවෙ මගෙ බැච් එකේම හිටපු යාලුවෙක් එක්ක apartment එකක් share කරගෙන.. අපි උයාගෙන කන්නෙ..මෙහෙ හැමදාම කඩෙන් කන්න අමාරුයි..වියදම සැරයි..

ඉතින් අපිට හිතුනා ජනවාරි පළවෙනිද නිසා කිරිබත් හදන්න..ඒත් අපි කවදාවත් කිරිබත් හදල තිබුනෙ නෑ..ඒක නිසා ඊයෙ රෑ පැය දෙකක් විතර කලේ ලංකාවෙ යාලුවන්ගෙන්, රයිස් කුකර් එකෙන් කිරිබත් උයන හැටි අහන එක..

skype,gmail,messenger,facebook....දාගෙන කෙටුව..

හැමෝම "අපෝ හරි ලේසියි..හාල් දාල වතුර දාන්න..පස්සෙ කිරි දාන්න.." කියල තමයි පටන් ගත්තෙ..ඒත් "බත් ඉදුනට පස්සෙද කිරි දාන්නෙ..? කොච්චර දානවද..?" කියල ඇහුවම තමයි රයිස් කුකර් එකේ උයන විදිය වෙනස් කියල හැමෝටම තේරුනේ..කවුරුත් එහෙම උයල තිබුනෙ නෑ..ඔය වෙලාවට තමයි පබිලිස් මහත්තයගෙ අගේ තෙරෙන්න..

"ඔන්න ඔහෙ නූඩ්ල්ස්ම කමු.." කියල මං නිදා ගන්න ගියා..

2010

2009-12-30T19:43:00.001-08:00

තව පැය කීපයකින් උදවෙන 2010 වසර සුභ නව වසරක් වේවා..

හැප්පෙන සින්දු

2009-12-28T21:37:00.000-08:00

හාපුරා කියලා මුලින්ම මං ලියන්න පටන් ගන්නේ මේ දවස්වල ජනප්‍රිය වූ music video වල දැක්ක රටාවක් ගැන.. සමහර විට ඔයාල මේක දන්නවත් ඇති...දැක්ක නැති අයට කියෙව්වාම මතක් වෙයි..

දෙනෙත් අගින් කඳුළැල් පිරිදී...

සිතට මගේ තව දුක දී..

නැවතත් ඔබ මා තුරුලේ..

නපුරුද ඔබගේ ආදරේ..

ආදරේ මටමයි කියා..

කීවා මතකයි දිවුරා එදා..

හැරයයි කියා හිතුවේ නෑ එදා..

මා හැරදමා ඈ ගියා..

වැස්සේ තෙමෙමින් රුක්ෂාන් කියන මේ සින්දුවෙ music video එක ඕගොල්ලො දැකල ඇති..මතකද ඒකෙ පෙම්වතිය මෝටර් රථයක හැප්පෙන scene එක..

සිත බැඳි කුමරී නොපෙනී.. යනවා.. ඇගෙ වත ඉල්ලා නෙතු කැන් හැඬුවා..

රිදවා සිතා මා... අද මා තනිවී..

පෙම් රුව නෑ බොඳ වී..

නිල් නුවන් මතකයට ගෙන ආ.. හද මගේ රිදවා..

රන් වතක් කොහෙදෝ සැඟවීලා..

නෙත මගේ සොයනවා..

රජිත සහ රඛිත් කියන මේ සින්දුවෙ music video එක ඔයාලට මතකද? ඒකෙ පාපැදියේ යන පෙම්වතිය මොටර් රථයක හැප්පෙන සංවේදී scene එක.. වැදිල විසිවෙලා යන හැටි..නිමේෂයකට අපේ හදවත් උනත් නවත්තනව..

මල් පෙත්තක් සේ සුසිනිදු සිත

මගෙන් ඔබ කොයින්දෝ හොරකම් කරා..

තව රිදෙන්න නෑ ඉඩක් මගෙ හදවතේ.. මට දුකද සතුට වේ..

කවුලුවෙන් එපිට මහ වර්ෂා වැටෙනවා

මට පෙනෙනවා ඔබෙ තිළිණ දුන් රෝස පඳුරේ

පිපුනු මලේ පෙති කඩා හැලෙනවා මට පේනවා..

Mobile phone එකේ battery dead නිසා coin box එකකින් තමන්ගේ පෙම්වතියට call කරන පෙම්වතා හදිසියේම ළඟින් යන බස් එකක යන තමන්ගෙ පෙම්වතිය දැකල කලබලයෙන් පාරට පනිනව..එතකොටම van එකක එයාව හැප්පෙනව.. එයාව ඒකෙ හැප්පෙනව..ඊට පස්සෙ ECG machine එකේ ශබ්දය මතකද.. සමහරවිට ඒක ඔයාලගෙ හිත්වල තාමත් රැඳිලා ඇති..

මේ සින්දුවලින් වලින් ආදරයේ විරහව අමුතුම විදියකට පෙන්නනවා..එක පාරට සිදුවන accident එකකින් පෙම්වතා හෝ පෙම්වතිය වෙන්ව යාම මේ ගීත වල music video වලින් එක එක විදියට පෙන්නල තියෙනව ..ඒවායේ මොකක් හරි රටාවක් තියනව වගේ මට පෙනුන නිසා, ඒ ගැන මට ලියන්නට හිතුන..